Əfsanəyə dönən ömür - Mübariz İbrahimovun doğum günüdür VİDEO
Biləsuvar, 7 fevral, İlkin Adıyev, AZƏRTAC
Bu gün canını Vətənə qurban verərək şəhidlik zirvəsinə ucalan Azərbaycanın Milli Qəhrəmanı, Mübariz İbrahimovun doğum günüdür.
Qısa ömür yaşamasına baxmayaraq, Vətən sevgisi onu qəhrəman etdi. Mübariz İbrahimov canını Vətən yolunda fəda etməsi ilə qəhrəmanlıq salnaməsi yazdı, özündən sonra böyük bir igidlik, mübarizlik məktəbi qoyub getdi.
AZƏRTAC-ın bölgə müxbiri xəbər verir ki, İbrahimov Mübariz Ağakərim oğlu 1988-ci il fevralın 7-də Biləsuvar rayonunun Əliabad kəndində anadan olub.
1994-cü ildə şəhid M.Piriyev adına Əliabad kənd orta məktəbində təhsil almağa başlayıb, 2005-ci ildə orta təhsilini başa vurub. Həmin il həqiqi hərbi xidmətə çağırılıb. Həqiqi hərbi xidmətini 2007-ci ildə çavuş rütbəsində başa vurub.
İki il mülki işlərdə işlədikdən sonra 2009-cu ilin avqust ayında yenidən orduya qayıtmağa qərar verib və öz arzusu ilə gizir rütbəsində, cəbhə bölgəsində hərbi xidmətə başlayıb.
Əsir düşən ana-bacılarımız, şəhid olan və yaralanan əsgər qardaşlarının taleyi, Qarabağ savaşında yurdundan didərgin düşmüş yüz minlərlə soydaşımızın dərd-səri Mübarizə rahatlıq vermirdi, onun qisas almaq duyğularını alovlandırırdı.
Elə bu səbəbdən 2010-cu il iyunun 19-da Tərtər istiqamətində, gecə saat 23 radələrində təkbaşına iki ordu arasındakı bir kilometrlik minalanmış sahəni keçən Mübariz Ermənistan Silahlı Qüvvələrinin çox sayda əsgər və zabitini ilk həmlədə məhv edir. Sonra isə düşmənin öz silahlarını özünə qarşı istifadə edərək beş saat onlarla təkbətək döyüşür. Düşməni ağır itkilərə məruz qoyur, onların zəif cinahlarını üzə çıxarır. Qorxmaz döyüşçü səhər saatlarında qeyri-bərabər döyüşdə qəhrəmancasına şəhid olur.
Prezident İlham Əliyevin Sərəncamı ilə gizir Mübariz İbrahimova ölümündən sonra “Azərbaycanın Milli Qəhrəmanı” adı verilib. Prezidentin başqa bir Sərəncamı ilə Milli Qəhrəmanın xatirəsi əbədiləşdirilib.
Ölümü ilə əfsanəyə dönən qəhrəmanımız bu gün də unudulmur, sevgi ilə yad edilir, hərbi xidmətə yollanan əsgərlərimizə nümunə göstərilir. Milli Qəhrəmanın döyüş yolunun, vətənpərvərlik, qəhrəmanlıq nümunəsinin gənc nəslə aşılanması üçün doğulduğu kənddə ev muzeyi yaradılıb. Burada Mübariz İbrahimovun şəxsi əşyaları, onun həyatını əks etdirən eksponatlar yer alır.
Milli Qəhrəmanın atası Ağakərim dayı deyir ki, Mübariz bu xalqın, elin övladıdır: “Xalqımız heç zaman Mübarizi unutmur, daim onun xatirəsini böyük hörmət və sevgi ilə yad edirlər. Mübarizin ev muzeyini ziyarətə gələnlər məndən onun uşaqlıq və gənclik illərini, keçdiyi həyat yolu barədə soruşurlar. Mübariz uşaqlıqdan qorxmaz və cəsur idi. Uşaq olarkən hər zaman deyirdi ki, böyüyəndə əsgər olub, ermənilərdən qisasımızı alacağam. Elə də etdi, böyüdü, hərbçi oldu, düşməndən qisasını alaraq şəhidlik zirvəsinə ucaldı. Mən Mübarizlə fəxr edirəm!”.
Bölmənin digər xəbərləri
