CƏMİYYƏT
Ekspert: Ən müasir su idarəetməsi tətbiq edilsə, vəziyyət indikindən də yaxşı ola bilər
![Ekspert: Ən müasir su idarəetməsi tətbiq edilsə, vəziyyət indikindən də yaxşı ola bilər](/files/2023/1/1200x630/1678798846187674099_1200x630.jpg)
Bakı, 14 mart, AZƏRTAC
Regionun ən quraq ölkəsi olan Azərbaycanda adambaşına düşən suyun miqdarı 810 litrdir. Ən quraq ərazilərimiz Mərkəzi Aran, Naxçıvan Muxtar Respublikası və Abşeron yarımadasıdır. Həmin ərazilərin davamlı su ilə təmin olunmasına ehtiyac var.
AZƏRTAC xəbər verir ki, bunu “Sağlam həyata doğru” İctimai Birliyinin üzvü, su məsələləri üzrə ekspert Rövşən Abbasov Ekologiya və Təbii Sərvətlər Nazirliyinin feysbuk səhifəsində yayımlanan “Ekspert saatı”nda deyib.
“Ölkəmizin su ehtiyatlarının əksəriyyəti xarici ölkələrin ərazisində formalaşır. Digər ölkələrə nisbətən aşağı axında yerləşdiyimiz üçün su ilə az təmin olunmuşuq. Ona görə də təchizatla bağlı problemlər yaşanır. Son 30-40 ildə orta temperaturun davamlı olaraq artması yağıntıların azalması, nəticədə isə çayların sululuğunun azalması ilə nəticələnir. Hazırda çayların sululuğunda 15-20 faizə qədər azalma var. Azərbaycanda su stresi indeksi kifayət qədər böyüyüb. Su stresi indeksi bir ölkə ərazisində təbii su mənbələrindən gələn su təchizatı ilə həmin ölkədə suya olan tələbat arasındakı nisbətdir. Həmin indeks getdikcə artmaqdadır. Proqnozlara görə, yaxın 20 ildə su ehtiyatları daha 15-20 faiz azala bilər. Bu, Azərbaycanda ciddi problem yarada bilər. Lakin yaxşı ssenarilər də var. Ən müasir su və suvarma infrastrukturu, su idarəetməsi tətbiq edə bilsək, vəziyyət indikindən də yaxşı ola bilər”, - deyə R.Abbasov bildirib.