Ekspert: Fransanın Azərbaycana qarşı davranışlarında asimmetrik müharibə elementləri görünür
Bakı, 13 oktyabr, AZƏRTAC
Fransa ATƏT-in Minsk qrupunun həmsədri qismində fəaliyyəti ilə sübut etmişdi ki, Qarabağ münaqişəsinə yanaşmada tərəfsiz davrana bilmir. Məsələni ədalətsiz formada, Ermənistanın xeyrinə həll etmək istəyir və bunun üçün bütün vasitələrə əl atır. Qarabağ münaqişəsinin bitməsindən sonra isə Fransanın davranışlarında yeni elementlər ortaya çıxıb. Görünən budur ki, o, Ermənistan üzərindən iş quraraq, Cənubi Qafqaza daxil olmaq, burada özünün təsir dairəsini yaratmaq istəyir. Yəni, əvvəllər öz siyasətini keçmiş “Qarabağ münaqişəsinin həllində vasitəçi olmaq” adı ilə pərdələyirdisə, Qarabağ probleminin həllindən sonra qlafını atıb. Prosesin önündə birbaşa özü görünməyə başlayıb.
Problem ondadır ki, Fransanın Cənubi Qafqaza yönəlik ekspansiya siyasəti zorakılığa əsaslanır. Həmçinin Fransa neokolonializm alətlərindən istifadə edir, Ermənistanla Azərbaycan arasında sülhün əldə edilməsinə mane olur. Rəsmi Paris iki ölkə arasında münaqişənin yenidən alovlandırılması üçün Ermənistanı stimullaşdırır, özünün Cənubi Qafqazda iştirakını münaqişələrin alovlandırılmasında görür. Eyni zamanda, Azərbaycanı da öz siyasətinə tabe etmək üçün təzyiq mexanizmlərindən yararlanır, beynəlxalq təşkilatlardakı təmsilçiliyindən faydalanaraq ölkəmizə təsir göstərməyə çalışır.
Bu sözləri AZƏRTAC-a açıqlamasında Mətbuat Şurasının İdarə Heyətinin üzvü, media eksperti Müşfiq Ələsgərli söyləyib.
Ekspertin sözlərinə görə, 44 günlük müharibədən sonra baş verən proseslər deməyə əsas yaradır ki, Fransa Azərbaycana qarşı davranışlarında asimmetrik müharibə elementlərinə istinad edir. Təsir dairəsində olan media qurumlarını, transmilli KİV-ləri qarayaxma kampaniyasına cəlb edir. Bu vasitə ilə qlobal ictimai rəyi Azərbaycana qarşı yönəltməyə çalışır. Paralel olaraq, beynəlxalq platformalarda qondarma müzakirələr açır, ölkəmizin adına kölgə salmağa cəhd edir. 2020-ci ildə hələ müharibənin davam etdiyi dövrdə Azərbaycanın məsələsini BMT Təhlükəsizlik Şurasının müzakirəsinə çıxararaq, təzyiq göstərmək, ölkəmizi özünün haqq işini tamamlamaqdan yayındırmaq istəmişdi. 2022-ci ilin dekabrında “Laçın yolu” mövzusunu əsas götürərək, Azərbaycan məsələsini BMT müstəvisinə çıxarmaq üçün növbəti dəfə təşəbbüs göstərmişdi. Eyni hərəkətlərini 2023-cü ilin avqust ayında da təkrarladı. Qarabağ bölgəsində yaşayan erməni əsilli sakinlərin guya “blokadaya salınması” barədə əsassız iddialar irəli sürdü. Bölgədə yaşayan ermənilər üçün yalançı humanitar yardım karvanı göndərməklə “humanitar böhran” kampaniyası başlatdı.
Vurğulanıb ki, Fransa Azərbaycana qarşı təzyiq mexanizmlərini bu gün də davam etdirir. Onun təşəbbüsü ilə bir qrup dövlət 2023-cü il oktyabrın 11-də BMT-nin İnsan Hüquqları Şurasında Azərbaycan əleyhinə birgə bəyanat veriblər. Bəyanatda Azərbaycanın Qarabağ bölgəsindən ermənilər köçməsinin səbəblərinə dair əsassız və böhtan xarakterli iddialar yer alır. Bundan əlavə, Ermənistana köçmüş erməni əhalisinə “qaçqın statusu”nun verilməsi ideyası irəli sürülüb.
Qəbul edilmiş bəyanatın qərəzliliyi, qeyri-obyektivliyi həm də ondadır ki, azərbaycanlıların Ermənistandakı yurdlarına qayıdış hüquqları barədə bircə kəlmə də yazılmayıb. Öz doğma torpaqlarından qovulmuş 1 milyona yaxın azərbaycanlının taleyinə laqeyd yanaşılıb. Sənəddə azərbaycanlı köçkünlər barədə heç nə deyilmir.
“Fransanın bu davranışları bölgədə gərginliyi artırmaq və sülh prosesini pozmağa hesablanıb. Emmanuel Makron hakimiyyəti belə yanlış hərəkətlərlə Azərbaycanın suveren hüquqlarına müdaxilə etdiyi kimi, Fransanın özünə də ciddi zərər vermiş olur. Fransanın “sülhsevər, demokratik ölkə” imicini dağıdır. Məhz belə davranışların nəticəsidir ki, Fransa əsrlər boyunca nəzarətində olan Afrika ölkələrindən qovulur, hər sahədə sıxışdırılır. Fransa Cənubi Qafqazdakı pozucu hərəkətlərinə görə də cavab verməli olacaq”, - deyə M. Ələsgərli qeyd edib.
Bölmənin digər xəbərləri
