Ekspert: WUF13 gələcək əməkdaşlıq üçün xüsusi əhəmiyyət daşıyır
Bakı, 20 may, AZƏRTAC
Dayanıqlı logistika və nəqliyyat infrastrukturunun inkişafı turizm potensialının genişlənməsinə və regionların sosial-iqtisadi inkişafına mühüm təsir göstərir.
Bunu AZƏRTAC-a müsahibəsində Ümumdünya Şəhərsalma Forumunun 13-cü Sessiyasında (WUF13) iştirak edən insan resursları üzrə ekspert Maksim İlizarov deyib.
Ekspert bildirib ki, rahat və dayanıqlı nəqliyyat infrastrukturu turizm sektorunun inkişafı üçün əsas şərtlərdən biridir:“Daha komfortlu logistika və nəqliyyat sistemi daha rahat turizm deməkdir. Rahat turizm isə turist sayının artmasına səbəb olur. Turistlərin çoxalması isə regionlara əlavə maliyyə axını və investisiya gətirir. Regionlara yönələn əlavə maliyyə resursları şəhərlərin və yaşayış məntəqələrinin daha sürətli və keyfiyyətli inkişafına şərait yaradır".
Ekspert qeyd edib ki, WUF13 çərçivəsində müxtəlif ölkələrin təcrübələrinin paylaşılması gələcək əməkdaşlıq üçün xüsusi əhəmiyyət daşıyır: “Burada çoxsaylı ölkələr iştirak edir və onların hər biri fərqli təcrübəyə malikdir. Bu isə ölkələr üçün bir-birindən öyrənmək, infrastrukturu təkmilləşdirmək və şəhərləri daha müasir etmək baxımından yaxşı imkandır. Tədbir çərçivəsində aparılan müzakirələr gələcəkdə şəhərsalma, nəqliyyat və logistika sahəsində regional əməkdaşlığın genişlənməsinə töhfə verə bilər".
Bölmənin digər xəbərləri
