EKSPERTLƏR NEFTİN QİYMƏTİNİN ARTACAĞINI BİLDİRİRLƏR
Britaniya ekspertləri cari ilin ikinci yarısında neftin qiymətinin xeyli artacağını proqnozlaşdırırlar. London Qlobal Enerji Tədqiqatları Mərkəzinin aylıq məruzəsində onlar bu cür meylə təkan verə biləcək bir sıra səbəblər olduğunu göstərirlər.
İTAR-TASS xəbər verir ki, ekspertlərin məlumatına görə, bu, ilk növbədə, OPEK ölkələrinin yanvarın 1-dən gündəlik neft hasilatını 1,5 milyon barrel azaltmaq barədə vədlərinin üstündə dura bilib -bilməyəcəklərindən, kartelin qoyduğu kvotanı dəstəkləməyən İraqın “qara qızıl” ixracının səviyyəsindən, habelə dünyada iqtisadi inkişafın sürətindən asılıdır.
Mərkəzin tədqiqatçılarının fikrincə, əgər OPEK neft hasilatının indiki səviyyəsini saxlasa və dünya iqtisadiyyatı yüksəlməyə başlasa, onda ilin sonunadək bir barrel neftin qiyməti 29,50 dollara çata bilər. ABŞ iqtisadiyyatında tənəzzülün getdikcə güclənməsi və İraqın neft ixracını artırması ən pis nəticə verə bilər. Ekspertlərin proqnozlarına görə, bu halda neftin bir barrelinin qiyməti 21,50 dollar səviyyəsində qala bilər.
Bölmənin digər xəbərləri
