EKZÜPERİNİN SİRLİ ÖLÜMÜNÜN SƏBƏBİ ARAŞDIRILIR
Məşhur “Balaca şahzadə” və “İnsanların yeri” əsərlərinin müəllifi 44 yaşlı Antuan Sən-Ekzüperi Lionla Qrenobi arasındakı ərazinin şəklini çəkmək üçün 1944-cü il iyulun 31-də idarə etdiyi döyüş təyyarəsi ilə Ot Korsikanın Lo Borqo təyyarə meydanından havaya qalxmış və bir daha geri qayıtmamışdır. Həmin gün səma aydın olmuş və hava döyüşü qeydə alınmamışdır. Daim radarların nəzarətində olmuş təyyarə qəflətən yoxa çıxmışdır. O zaman təyyarənin axtarışı heç bir nəticə verməmiş, yazıçının həlak olması bir sirr olaraq qalmışdır.
1998-ci ildə Marsel balıqçıları Aralıq dənizinin Riu adası yaxınlığında təsadüfən yazıçının adının həkk olunduğu qolbağını tapmışlar. Tapılmış əşya qaranlıq qalmış məsələyə heç bir aydınlıq gətirməmişdir.
AZƏRTAC-ın müxbiri xəbər verir ki, bu günlərdə həmin adada dalğıclar yazıçının idarə etdiyi təyyarənin iki parçasını tapmışlar. Həmin hissələr mütəxəssislər tərəfindən diqqətlə öyrənilsə də, qəzanın əsl səbəbi barədə yekdil bir fikir yoxdur.
Yazıçının həyatını və irsini araşdıran tədqiqatçı Patrik Erhardın fikrincə, Alp dağları üzərində uçan təyyarə hündür zirvələrin birinə dəyərək zədələnmiş və bir müddətdən sonra Aralıq dənizi üzərində partlayaraq suya düşmüşdür.
Bu, hələlik bir fərziyyədir. Təcrübəli pilot və yazıçı Ekzüperinin həlak olmasının sirrinin araşdırılması bu gün də davam etdirilir.
Bölmənin digər xəbərləri
