ELEKTRİK ENERJİSİ İLƏ TƏCHİZATI YAXŞILAŞDIRMAQ ÜÇÜN İNVESTİSİYA LAYİHƏSİ HAZIRLANMIŞDIR

07.02.2006 [13:03]
Çap et
A⁺ A^-

“Barmek Azərbaycan Elektrik Şəbəkəsi” Məhdud Məsuliyyətli Cəmiyyətdən AZƏRTAC-a bildirmişlər ki, investisiya qoyuluşu və yeni texnologiyalar hesabına itkiləri xeyli azaltmaq və düzgün tariflər tətbiq etməklə, üç il ərzində ölkə ərazisində elektrik enerjisi istehlakına 6 milyard kilovat-saat, yaxud ildə ən azı 250 milyon ABŞ dolları məbləğində vəsaitə qənaət etmək mümkündür.

Məhdud Məsuliyyətli Cəmiyyətin investisiya proqramına əsasən, 2006-2015-ci illərdə Bakı və Sumqayıt şəbəkələri üzrə 140 milyon ABŞ dolları məbləğində proqnozlaşdırılan sərmayə qoyuluşu Azərbaycanın bugünkü sürətli inkişafını təmin etmir. Ona görə də Bakı, Sumqayıt və şimal rayonlarının sosial və iqtisadi inkişafının davamlılığını təmin etmək üçün iki il ərzində 154 milyon ABŞ dolları məbləğində investisiya layihələri hazırlanmışdır. Bu layihələrə görə, 16 yeni yüksəkgərginlikli yarımstansiya, 100 ədəd ortagərginlikli transformator mərkəzinin quraşdırılması, yenidənqurma işlərinin aparılması, yeni elektrikötürmə xətlərinin çəkilişi və mövcud xətlərin yeniləşdirilməsi nəzərdə tutulur.

Bu tədbirlər elektrik enerjisi təchizatını daha da yaxşılaşdıracaq, enerji itkilərinin azalmasına zəmin yaradacaqdır.