ƏLİ HƏSƏNOV: AZƏRBAYCAN HAKİMİYYƏTİ PREZİDENT SEÇKİLƏRİNİN MAKSİMUM ŞƏFFAF VƏ DEMOKRATİK KEÇİRİLMƏSİNDƏ MARAQLIDIR
AZƏRTAC-ın xüsusi müxbiri xəbər verir ki, ABŞ Milli Demokratiya İnstitutunun dəvəti ilə bu ölkədə işgüzar səfərdə olan Azərbaycan Prezidentinin İcra Aparatının ictimai-siyasi məsələlər üzrə şöbəsinin müdiri Əli Həsənov sentyabrın 4-5-də Vaşinqtonda bir sıra görüşlər keçirmişdir. Dövlət Departamenti, Konqres, Beynəlxalq İnkişaf Agentliyi, habelə Milli Demokratiya İnstitutu, Beynəlxalq Respublikaçılar İnstitutu, Milli Demokratiya Fondu və bir sıra digər nüfuzlu qeyri-hökumət təşkilatlarının nümayəndələri ilə müzakirələr zamanı Azərbaycanda demokratik islahatların gedişatı, insan hüquqları ilə bağlı vəziyyət, vətəndaş cəmiyyəti quruculuğu prosesi, eləcə də qarşıdan gələn prezident seçkilərinə hazırlıq məsələləri diqqət mərkəzində olmuşdur.
Dövlət katibinin demokratiya, insan hüquqları və əmək üzrə müavini Deyvid Kreymerlə bir saatdan çox davam edən görüş zamanı Əli Həsənov həmsöhbətinin Konqresin Helsinki Komissiyasında Azərbaycanla bağlı keçirilən son dinləmələrdəki çıxışında əks olunan bəzi məqamlarla bağlı Azərbaycan hökumətinin fərqli mövqeyini çatdırmış, ölkəmizdəki vəziyyəti təhlil edərək, ictimai-sosial islahatlar, hüquqi dövlət quruculuğu ilə bağlı reallıqlardan danışmışdır. Eyni zamanda, Azərbaycanda qarşıdakı prezident seçkilərinə hazırlıq, Seçki Məcəlləsinə edilən dəyişikliklər, qeydiyyatdan keçən namizədlər və onların seçki platformaları barədə məlumat verilmişdir.
Vaşinqtondakı görüşlərini AZƏRTAC-a şərh edən Əli Həsənov demişdir: “Azərbaycan demokratiya yolunu özü seçib və bu istiqamətdə inamla irəliləyir. Demokratiya problemsiz yol deyildir. Amerikada olduğu kimi, biz də həmişə mövcud çətinlikləri və problemləri aradan qaldırmaq üzərində işləyirik. Lakin bu problemlər aparıcı meyil deyildir. Azərbaycanda baş verən ayrı-ayrı hadisələr ölkədə demokratiya ilə bağlı ümumi vəziyyəti əks etdirmir. Mən bu fikri amerikalı tərəfdaşlarımızın diqqətinə çatdırdım. Bildirdim ki, Azərbaycan hökumətinin mövcud problemləri aradan qaldırmaq üçün həm iradəsi, həm də səyləri yetərlidir. Vaşinqton Azərbaycanda qarşıdan gələn seçkilərin beynəxlaq standartlara uyğun keçməsini istəyir. Biz də maksimum dərəcədə çalışacağıq ki, seçkilər sözün əsl mənasında şəffaf və demokratik keçirilsin, əhalinin iradəsini əks etdirsin və qarşıdurma ilə nəticələnməsin”.
Xatırladaq ki, Əli Həsənov ABŞ-a səfəri zamanı Demokratlar Partiyasının Kolorado ştatında keçirilən seçkiqabağı qurultayında da iştirak etmişdir. Qurultay çərçivəsində Milli Demokratik İnstitutun təşəbbüsü ilə təşkil olunan Beynəlxalq Liderlər Forumunda Demokratlar Partiyasının xarici siyasət platforması təhlil edilmiş, Barak Obamanın qələbəsinin beynəlxalq hadisələrə mümkün təsiri barədə fikir mübadiləsi aparılmışdır. Ə.Həsənov Forumda “Cənubi Qafqazda baş verən hadisələr müasir beynəlxalq hüquq fonunda” mövzusunda çıxış etmişdir. O vurğulamışdır ki, bölgədəki dövlətlərin ərazi bütövlüyünü pozan münaqişələr etnik separatizmdən qaynaqlanır. Beynəlxalq hüquq isə bu münaqişələrin həllində gücsüzdür, çünki müxtəlif təşkilatlar, o cümlədən BMT kimi ali beynəlxalq orqanın qəbul etdiyi qərarlarının həyata keçirilməsi mexanizmi qənaətbəxş deyildir.
Bölmənin digər xəbərləri
