Elmir Vəlizadə: Radio müasir zamanda da öz aktuallığını saxlayır
Bakı, 11 dekabr, AZƏRTAC
Azərbaycanda 1926-cı ildən başlayaraq radioyayım tarixi müxtəlif zamanlarda yaddaqalan hadisələrlə zəngin olub, ciddi təcrübə toplanılıb.
AZƏRTAC xəbər verir ki, bu sözləri Prezident Administrasiyasının sektor müdiri Elmir Vəlizadə "Azərbaycanda radioyayımın dünəni, bu günü və sabahı" mövzusunda keçirilən seminarda söyləyib.
O bildirib ki, müstəqilliyin ilk günlərində Azərbaycanda sahibkarlıq üçün yaradılmış əlverişli şərait və informasiya sahəsində demokratik dəyərlər radioyayım sahəsində özəl kanalların fəaliyyətə başlamasına səbəb olub. Dövlət hər zaman bu sahəyə öz diqqətini göstərib, məhz bunun sayəsində təkcə paytaxt Bakıda deyil, regionlarda da kanallar fəaliyyət göstərməkdədir.
Sektor müdiri əlavə edib ki, radio müasir zamanda da öz aktuallığını saxlayır, əhalinin məlumatlandırılmasında, ictimai rəyin formalaşdırılmasında mühüm rol oynayır. Bu səbəbdən zamanın tələbinə uyğun qabaqcıl texnologiyaların tətbiqi zərurətdir.
“2016-cı ildən başlayaraq Prezident İlham Əliyevin sərəncamları ilə ölkədə mövcud yayım stansiyalarının maddi-texniki bazasının yaxşılaşdırılması, dayanıqlı fəaliyyətinin təmin edilməsi və fasiləsiz enerji təminatı üçün zəruri infrastrukturun yaradılması, radioyayım şəbəkəsinin müasirləşdirilməsi və genişləndirilməsi məqsədilə beş dəfə 15 milyon manat həcmində birdəfəlik maliyyə yardımları edilib”, - deyə E.Vəlizadə vurğulayıb.
Bölmənin digər xəbərləri
