Əməkdar Jurnalistin Qarabağ döyüşçülərinə həsr etdiyi kitab təqdim olunmuşdur
Bakı, 7 iyul (AZƏRTAC, Gözəl Ağayeva). İyulun 7-də “Azərbaycan Respublikası Dağlıq Qarabağ Bölgəsinin Azərbaycanlı İcması” İctimai Birliyi tərəfindən Azərbaycanın Əməkdar Jurnalisti Tatyana Çaladzenin “Karabaxskaya oteçestvennaya: oni umirali çestno” kitabının təqdimatı keçirilmişdir.
AZƏRTAC xəbər verir ki, dövlət və hökumət rəsmilərinin, Milli Məclisin deputatlarının, Qarabağ uğrunda döyüşlərin iştirakçılarının, ictimaiyyət nümayəndələrinin iştirakı ilə keçirilən tədbiri açan İctimai Birliyin idarə heyətinin sədri, icmanın rəhbəri Bayram Səfərov təqdimat mərasiminin Ağdərə rayonunun ermənilər tərəfindən işğalı ilə eyni günə düşdüyünü diqqətə çatdırmışdır.
Tədbirdə Vətənimizin torpaqlarının azad edilməsi uğrunda canlarından keçmiş qəhrəman oğul və qızlarımızın əziz xatirələri bir dəqiqəlik sükutla yad edilmişdir.
Mərasimdə çıxış edən Bayram Səfərov bildirmişdir ki, bu gün Azərbaycan Respublikasının Prezidenti İlham Əliyevin həyata keçirdiyi müdrik daxili və xarici siyasət, dövlətimizin beynəlxalq aləmdə gündən-günə artan nüfuzu bizim hər birimizdə torpaqlarımızın tezliklə erməni işğalçılarından azad olunacağına tam əminlik yaradır.
Bildirilmişdir ki, təqdimatı keçirilən kitabın müəllifi Tatyana Çaladze Latviyada dünyaya gəlmiş və orada jurnalist fəaliyyəti ilə məşğul olmuşdur. O, 1992-ci ildən etibarən Dağlıq Qarabağ müharibəsini işıqlandırmağa başlamış, Azərbaycanın haqq səsini dünyaya çatdırmaq üçün ölkəmizə gəlmişdir. Azərbaycan Prezidenti İlham Əliyevin 2010-cu il 22 iyul tarixli Sərəncamı ilə Tatyana Çaladze “Əməkdar Jurnalist” fəxri adına layiq görülmüşdür. Onu ölkəmizə gətirən ermənilərin yalançı iddialarının arxasında duran qüvvələr tərəfindən Ermənistan-Azərbaycan, Dağlıq Qarabağ münaqişəsi haqqında birtərəfli məlumatların yayılması olmuşdur. Təqdimatı keçirilən kitabda göstərildiyi kimi, müəllif döyüş zonalarının ən qaynar nöqtələrində olmuş və yaralanmışdır.
Tatyana Çaladze Ermənistan-Azərbaycan, Dağlıq Qarabağ münaqişəsi haqqında bir sıra məqalələrin müəllifidir. O, erməni terror təşkilatlarının bəşəriyyət əleyhinə törətdikləri cinayətlər haqqında məsələləri açıq şəkildə qaldıran ilk əcnəbi jurnalistlərdən biridir. Ağdam, Ağdərə, Füzuli döyüş bölgələrində olmuş müəllif bu kitabda Azərbaycanın igid oğullarının döyüş yollarından bəhs etmişdir.
Bayram Səfərov bildirmişdir ki, rusca yazılmış bu kitabın Azərbaycan dilinə tərcümə edilməsi və ümumtəhsil məktəblərində yayılması çox məqsədəuyğun olardı. Həmçinin gənc nəslin hərbi vətənpərvərlik tərbiyəsi baxımından da kitabın böyük əhəmiyyəti vardır.
“Azərbaycan Respublikası Dağlıq Qarabağ Bölgəsinin Azərbaycanlı İcması” İctimai Birliyinin Qarabağ Araşdırma Mərkəzinin müdiri Elçin Əhmədov Dağlıq Qarabağın muxtariyyətinin yaradılmasının Azərbaycanın inzibati-ərazi bölgüsünün pozulması ilə nəticələndiyini bildirmiş, bununla bağlı tarixi faktları tədbir iştirakçılarının diqqətinə çatdırmışdır.
Mərasimdə çıxış edən Milli Məclisin deputatı Bəxtiyar Sadıqov bildirmişdir ki, Əməkdar Jurnalist Tatyana Çaladzenin bu kitabında Azərbaycan həqiqətləri öz əksini tapmışdır. “Baltiyskoye vremya” qəzetinin baş redaktoru olmuş Tatyana Çeladze Azərbaycan həqiqətlərini işıqlandırarkən ölkəmiz informasiya blokadasında idi. Bir diqqətli jurnalist kimi o, qarşı tərəfin fikrini öyrənmək məqsədilə Azərbaycana gələrək, buradakı həqiqətlər, Xocalı faciəsi haqqında materiallar toplamış və çalışdığı qəzetin bir nömrəsini ölkəmizə həsr etmişdir. Tatyana Çaladze bu nömrəni buraxması ilə həm də keçmiş sovet imperiyasının siyasətinə qarşı çıxmış, həqiqəti deməklə erməniləri ifşa etmiş, bütövlükdə bu məsələlər üzrə qəbul olunmuş normalar prinsipindən kənara çıxmışdır.
Milli Məclisin deputatı Bəxtiyar Sadıqov təqdimatı keçirilən kitabın müəllifin ömrünün bir parçası olduğunu diqqətə çatdırmışdır. Bildirmişdir ki, kitabdakı həqiqətlərdən biri Azərbaycan xalqının, o cümlədən silahı, qoşunu olmayan, dövlət tərəfindən müdafiə edilməyən, eyni zamanda, torpağının qədrini bilən, kəndindən-kəsəyindən ayrılmaq istəməyən insanların öz torpaqları uğrunda mübarizəyə qalxmasıdır. Bu kitabda o insanların qəhrəmanlığı görünür. Nəşrdə, həmçinin ermənilər haqqında yalan informasiya da ifşa edilmişdir.
Kitab şahid jurnalistin yazdıqları baxımından da qiymətlidir. Nəşrdə yer almış fotoların hər biri isə bir tarixidir. Kitabın rus dilində yazılması və nəşr olunması onun daha geniş auditoriyaya çatdırılması baxımından əhəmiyyətlidir.
Təqdimatı keçirilən kitabın əhəmiyyətindən danışan Milli Məclisin deputatı Aydın Mirzəzadə Əməkdar Jurnalist Tatyana Çaladzenin bu kitabını müəllifin Qarabağ haqqında həqiqətləri növbəti dəfə Azərbaycan auditoriyasından kənara çıxarması baxımından yüksək qiymətləndirmişdir.
Mərasimdə çıxış edən DİN-in təqaüddə olan polkovniki Cahangir Zeynalov, istefada olan hərbiçi, polkovnik Əzizağa Qənizadə, filologiya üzrə fəlsəfə doktoru Pərvanə Məmmədli kitabın əhəmiyyətindən söz açmışlar.
Qeyd olunmuşdur ki, “Azərbaycan” nəşriyyatında çap edilən bu sənədli povest müəllifin həyatından avtobioqrafik hadisələr, gündəlik yazıları, təəssüratları, şəxsi əlyazmaları əsasında ərsəyə gəlmiş və geniş oxucu kütləsi üçün nəzərdə tutulmuşdur.
Sonda Azərbaycan Respublikasının Prezidenti Administrasiyası ictimai-siyasi məsələlər şöbəsinin əməkdaşı Elman Paşayev kitabın aktuallığını vurğulamış və başqa dillərə tərcümə olunmasının vacibliyini bildirmişdir.
Çıxışlarda belə bir kitabı ərsəyə gətirdiyi üçün müəllifə dönə-dönə təşəkkür edilmiş və ona yeni yaradıcılıq uğurları arzulanmışdır.
Bölmənin digər xəbərləri
