Ən populyar veb-brauzer – Chrome
Bakı, 29 may (AZƏRTAC). StatCounter xidmətinin subyektiv statistik hesablamalarına əsasən, Chrome tarixdə ilk dəfə olaraq dünyanın ən populyar brauzeri elan edilmişdir. Bu veb-brauzer mayın 14-dən 20-dək ən çox istifadə olunan brauzer olmuşdur. “Google” şirkətinin məhsulu olan Chrome bu müddətdə bazar payını 32,76 faizə çatdırmışdır. Bu da 31,94 faiz göstəricisi olan Internet Explorer-i geridə qoymağa kifayət etmişdir.
Liderliyinə baxmayaraq, ayrı-ayrı regionlarda Chrome rəqiblərinə güzəştə gedir. Belə ki, Şimali Amerikada hələ də “Microsoft” şirkətinə məxsus brauzer liderlik edir. Liderlik yarışmasına Firefox-un başçılıq etdiyi Avropada isə Chrome Internet Explorer-i tamamilə az fərqlə qabaqlayır. Afrikada da eyni vəziyyət müşahidə olunur.
Azərbaycan Milli Elmlər Akademiyasının İnformasiya Texnologiyaları İnstitutundan AZƏRTAC- a bildirmişlər ki, www.dailycomm.ru saytının məlumatına görə, Chrome brauzeri yalnız payının 50 faizlə ölçüldüyü Cənubi Amerikada böyük fərqlə liderlik edir. Ekspertlər regionda proqramın populyarlığını burada Google Orkut sosial xidmətinin geniş yayılması ilə izah edirlər.
Bölmənin digər xəbərləri
