ƏN YAXŞI HAVA LİMANLARININ REYTİNQİ TƏRTİB EDİLMİŞDİR
Bu il ən yaxşı hava limanlarının ilk beşliyində 4 yeri Asiya hava limanları tutmuş, Avropanın şərəfini isə fəxri üçüncü yerə çıxan Münxen limanı qorumuşdur.
Qalib şəhərlər beşliyində ardıcıllıq belədir: Sinqapur, onun ənənəvi rəqibi Honkonq, Münxen, Osaka və Seul aerovağzalları. Sonrakı yerləri Kuala-Lumpur, Helsinki, Sürix və Dubay, sonuncu yeri isə Kopenhagen hava limanları tutur.
Qiymətləndirməni Britaniya mütəxəssisləri 2005-ci ilin sentyabrından 2006-cı ilin mayınadək aparmışlar. Bu dövr ərzində 93 milləti təmsil edən 7,2 milyondan artıq aviasərnişin müvafiq anketləri doldurmuşdur. Təhlil obyekti Avropa, Asiya, Afrika və Amerikanın 165 hava limanı olmuşdur.
Britaniya şirkəti hər qitə üzrə də müvafiq məlumatları yoxlamışdır. Məsələn, Şimali Amerikada San-Fransisko, Vankuver və Denver hava limanları, Avstraliya və Okeaniyada Sidney və Pert, Afrikada Keyptaun və Yohannesburq, Cənubi Amerikada Buenos-Ayres, Lima və Santyaqo, Yaxın Şərqdə Dubay, Beyrut və Bəhreyn, Avropanın cənubunda Afina və Barselona, Mərkəzi Avropada isə Münxen, Sürix və Amsterdam hava limanları ən yaxşı sayılmışlar.
