EQ.5-in əlamətləri əvvəlki ştamlardan o qədər də fərqlənmir
Bakı, 18 sentyabr, AZƏRTAC
Yeni növ koronavirusun (COVID-19) çox böyük sürətlə artması karantin rejiminin yenidən sərtləşməsinə əsas yaradır. Yeni ştamın digər variantlarla müqayisədə yoluxduruculuq qabiliyyətinin yüksək olması səhiyyə işçilərini ciddi narahat edir.
AZƏRTAC xəbər verir ki, həkim-infeksionist Aytən Ziyadova deyib: “Sonuncu EQ.5 mutasiya variantı kimi qeyd olunsa da, variantlar xeyli çoxdur. Ona görə də onların xəstəlik törətmə imkanları, yayılma intensivliyi, yoluxuculuq indeksi yüksək olsa da, ağırlaşma və ölüm törətmə halları xeyli aşağı düşüb”.
O, yeni ştamın əlamətlərinə gəldikdə isə bunun əvvəlki əlamətlərdən elə də fərqlənmədiyini deyib: “Daha çox müşahidə olunan mədə-bağırsaq, uşaqlarda daha çox qusma, ishal, böyüklərdə ümumi halsızlıq, zəiflik, burun axıntısı, öskürək və digər əlamətlərdir. Koronavirusun digər variantlarına nisbətən yeni ştam o qədər böyük təhlükə törətmir və xəstəyə bir neçə gün ev şəraitində qulluq göstərilməsi infeksiyanın sovuşması üçün kifayət edir”.
Bir neçə gün əvvəl məktəblər açıldığına görə epidemioloji vəziyyətin pisləşməsi baş verə bilər. Ona görə də müxtəlif məkanlarda adamların kütləvi toplaşması məsləhət görülmür. Əks halda virusa yoluxanların sayı artar, yenidən maska taxmaq məcburi olar və karantin qaydaları sərtləşdirilə bilər.
Bölmənin digər xəbərləri
