Ərəb dövlətləri Azərbaycanın mövqeyini dəstəkləməyi strateji cəhətdən məqsədəuyğun hesab edirlər - Politoloq
Bakı, 3 mart, AZƏRTAC
Bakı yenidən daha bir möhtəşəm tədbirə şahidlik etdi. Belə ki, Qoşulmama Hərəkatının (QH) COVID-19-a qarşı mübarizə üzrə Təmas Qrupunun Zirvə görüşü məhz Bakıda keçirildi. Bu həm siyasi və iqtisadi, həm də humanitar cəhətdən olduqca vacib bir tədbirdir.
İkinci Qarabağ müharibəsi başlanan tarixədək QH ən azından 6 müxtəlif Zirvə görüşündə ölkəmizin haqlı mövqeyini dəstəkləyən və Azərbaycanın ərazi bütövlüyünün təmin olunmasını özündə ehtiva edən bəyanat qəbul edib. Azərbaycanın bu təşkilata üzv olması və sonradan sədrlik etməsi isə birbaşa ölkəmizin xarici siyasətində yeni bir istiqamət kimi qiymətləndirilməlidir.
Bu fikirləri AZƏRTAC-a açıqlamasında politoloq Amid Əliyev söyləyib.
Bu gün QH tərəfindən Azərbaycana qarşı siyasi dəstəyin göstərilməsi davam etdiyini diqqətə çatdıran politoloq deyib: “Keçən il Ermənistan və onun havadarları tərəfindən BMT-nin Təhlükəsizlik Şurasında (TŞ) Azərbaycana qarşı qərəzli qətnamənin qəbul olunması zamanı QH-yə üzv dövlətlər tərəfindən buna veto qoyuldu.
Müharibədən sonra Azərbaycanın xarici siyasətinin əsas istiqaməti kimi müəyyən edilən Ərəb dünyasına inteqrasiya da məhz bu təşkilatla uğurlu əməkdaşlıq fonunda daha səmərəli oldu. Təkcə 2022-ci ildə dövlətimizin başçısı iki dəfə Ərəb ölkələri tərəfindən təşkil olunan iki mötəbər tədbirə fəxri qonaq qismində dəvət edildi. Məhz QH-yə üzv olan Ərəb dövlətləri Azərbaycana qarşı Fransa tərəfindən Tunisin Cəbrə adasında hazırlanan yekun bəyannamədəki qərəzli maddələrin qəbul olunmasına imkan vermədi.
Bu, onu deməyə əsas verir ki, birincisi, Azərbaycanın həyata keçirdiyi xarici siyasət kursu uğurludur. İkincisi isə artıq Avropa, Orta Asiya ölkələri kimi Ərəb dövlətləri də beynəlxalq müstəvidə Azərbaycanın iştirakı olmadan belə, onun haqlı mövqeyini müdafiə etməyi strateji cəhətdən məqsədəuyğun hesab edirlər. Bu, heç də təsadüfi deyil, çünki keçən ikiillik pandemiya dövründə Azərbaycan tərəfindən bir çox üzv dövlətlərə maddi və humanitar yardımlar göstərilib. Məhz BMT səviyyəsində pandemiya dövründə bərabər yardımın göstərilməsi və imkanların əlçatan olması mövzusunda beynəlxalq səviyyəli görüşün keçirilməsinin də təşəbbüskarı Azərbaycan oldu. Bu məqamlar da QH üzvləri ilə Azərbaycan arasında etimad və etibar körpüsünün qurulmasında əhəmiyyətli element rolunu oynadı”.
Politoloq qeyd edib ki, Azərbaycanın sədrliyi dövründə təşkilatın institusionallaşması istiqamətində də vacib addımlar atıldı. Təşkilatın Gənclər Hərəkatı və Parlament Assambleyasının qurulması işi də uğurla icra olundu. Qeyd olunan faktlar Azərbaycanın təşkilata sədrlik müddətinin növbəti dəfə qeyd-şərtsiz prolonqasiya olunmasına vacib zəmin yaratdı. Bu, eyni vaxtda məhz Qalib imicinə malik Azərbaycanın QH-yə rəhbərlik etməsinin üzv dövlətlərin istəyi ilə olması faktını ortaya qoydu.
“Hazırkı məqamda bölgədə baş verən proseslər fonunda təşkilatın Zirvə görüşünün Bakıda keçirilməsi olduqca vacibdir. Birincisi, ona görə ki, Azərbaycan tərəfindən irəli sürülən sülh gündəliyi çərçivəsində son yeniliklər diqqətə çatdırılır. İkincisi, üzv dövlətlərin Bakıda toplaşması Azərbaycanın bu təşkilat çərçivəsində artan nüfuzuna işarədir. Üçüncüsü isə üzv dövlətlərlə qarşılıqlı şəkildə iqtisadi və humanitar yönümlü əməkdaşlıq yeni istiqamətlər üzrə əlaqələrin genişləndirilməsi üçün münbit platformadır.
Ümumiyyətlə isə ölkəmizin bu təşkilata effektiv sədrliyi və səmərəli əməkdaşlıq şəbəkəsinin qurulması bir daha onu deməyə əsas verir ki, Azərbaycan vacib və etibarlı tərəfdaşdır. Bu isə son zamanlar Qərb-Rusiya kolliziyası fonunda meydana çıxan arzu olunmayan iqtisadi itkilərin aradan qaldırılması zamanı daha çox qiymətləndirilən cəhətdir”, - deyə Amid Əliyev vurğulayıb.
Bölmənin digər xəbərləri
