Ərəb və Pakistan parlamentləri Azərbaycanı Zəfər Günü ilə bağlı təbrik ediblər
Bakı, 5 noyabr, AZƏRTAC
Ərəb Parlamentinin prezidenti Mohamed Alyammahi, Pakistan İslam Respublikası Parlamenti Senatının sədri Syed Yusuf Raza Gilani və bu ölkənin Milli Assambleyasının sədri Sərdar Ayaz Sadiq 8 Noyabr – Zəfər Günü münasibətilə Milli Məclisin sədri Sahibə Qafarovaya təbrik məktubları ünvanlayıblar.
Milli Məclisin Mətbuat və ictimaiyyətlə əlaqələr şöbəsindən AZƏRTAC-a bildirilib ki, tərəflər məktublarda Zəfər Gününün beşinci ildönümü münasibətilə təbriklərini çatdırıb və bu əlamətdar günün Azərbaycan xalqının möhkəm iradəsinin, birliyinin və əzminin rəmzi olduğunu vurğulayıblar. Qeyd edilib ki, Prezident İlham Əliyevin uzaqgörən rəhbərliyi ilə aparılmış tarixi mübarizə nəticəsində dövlətin suverenliyi və ərazi bütövlüyü bərpa olunub. Qazanılan uğurlar isə ölkənin inkişafı və rifahı üçün möhkəm zəmin yaradır.
Məktublarda, həmçinin əməkdaşlıq, sabitlik və qarşılıqlı anlayışın önəmi diqqətə çatdırılaraq, parlamentlərarası əlaqələrin daha da inkişaf edəcəyinə əminlik ifadə olunub, dost Azərbaycan xalqına tərəqqi, firavanlıq və sabit gələcək arzulanıb.
Bölmənin digər xəbərləri
