Erkən müayinə və müalicə tədbirləri süd vəzi xərçəngində ölüm faizini azaldır
Bakı, 27 fevral, AZƏRTAC
“Erkən müayinə və müalicə tədbirləri süd vəzi xərçəngində ölüm faizini azaldır. Yəni məqsəd 1 santimetrə qədər olan erkən xərçəngləri aşkar etməkdir. Bu halda proqnoz ölüm göstəricisinin 98-99 faiz azaldığını göstərir. Xərçəngin erkən aşkar edilməsinin əsas üstünlüyü odur ki, həm asan və yüngül müalicələrlə kifayətlənir, həm də kiçik əməliyyatlarla əlilliyə gətirib çıxarmayan müsbət nəticə əldə etmək olur”.
AZƏRTAC Azərbaycan Tibb Universitetinin mətbuat xidmətində istinadla bildirir ki, bunu universitetin Şüa diaqnostikası və şüa terapiyası kafedrasının assistenti Günel Əliyeva deyib. Qadın bədəninin 18 yaşdan sonra tam formalaşdığını, hormonal statusunun stabilləşdiyini, ona görə də qızların 18-20 yaşdan etibarən müayinəyə cəlb olunduğunu deyən həkim onu da bildirib ki, 20-40 yaş arası qadınları mammoqrafik müayinə etmək olmaz: “Çünki mammoqrafiyanın yüksək effektivliyinə baxmayaraq, cavan qadınlarda, hansı ki, süd vəzləri bu və ya digər səbəbdən yüksək sıxlığı ilə seçilir, onun nəticələri düzgün olmaya bilər. Biz mammoqrafik müayinə zamanı həmin yüksək toxuma fonunda dəyişikliyi görə bilmirik. Ona görə də 20 yaşdan yuxarı qızlarımız ancaq ultrasəs müayinəsindən keçməlidir. Ultrasəs müayinəsinin fiziki əsasları ionlaşdırıcı şüalar deyil, exo, yəni səs siqnalları olduğu üçün bədənə heç bir ziyanlı təsiri yoxdur. Bunu nəzərə alaraq qadınlarda erkən aparılan müayinəni USM müayinəsi ilə başlayırıq. Lakin burada bir müstəsna var, genlərdə olan müxtəlif mutasiyalar, xəstələrdə irsi faktorlara meyillilik, yəni ana, xala və digər qohumlarda təkrarlanmış süd vəzi xərçəngi və yaxud yumurtalıq xərçəngi varsa, biz bu qadınları mütləq gen analizinə göndəririk. Gen analizində mutasiya aşkarlanarsa, USM-dən əlavə MRT müayinəsinə də zərurət yaranır. Dünyada artıq bu praktika çoxdan və geniş tətbiq olunur”.
Mammoqrafik müayinə zamanı müasir rəqəmsal aparatların rolundan da danışan G.Əliyevanın sözlərinə görə, müasir rəqəmsal sistemlərin klinik təcrübədə tətbiqi adi rentgenoqrafiyanın mənfi xüsusiyyətini kompensasiya etməyə imkan verir: “Belə ki, həm şəklin keyfiyyəti yaxşılaşır, həm də eyni zamanda bir neçə proyeksiyada alına bilər, kontrastlıq və parlaqlığı dəyişmək mümkündür, müəyyən hissəni böyüdərək baxmaq olur. Həmçinin plyonkadan fərqli olaraq bu sistemdə məlumatlar daha etibarlı qorunur. Unutmamalıyıq ki, hər bir radioloq üçün müqayisəli təhlil çox vacibdir. Əgər xəstə müəyyən müddətdən sonra gəlirsə, həkim 1 il, 6 ay əvvəlki nəticələri tutuşduraraq yeni bir törəmənin yaranıb-yaranmamasını dəqiqləşdirir. Yəni müxtəlif metodları müxtəlif şəkildə kombinə etdikdə, məlumat çox olur və düzgün diaqnoz qoymaq asanlaşır”.
Bölmənin digər xəbərləri
