ERMƏNİLƏR İŞĞAL ETDİKLƏRİ AZƏRBAYCAN ƏRAZİLƏRİNDƏ MƏQSƏDLİ ŞƏKİLDƏ YANĞINLAR TÖRƏDİRLƏR
İspaniyadan olan deputat İnaki Tksuekanın məruzəsində və məruzə ətrafında müzakirələrdə son illər iqlimdə gedən dəyişikliklərin bütün dünyada ciddi narahatlıq doğurmasından, ətraf mühitin çirklənməsinin, içməli su çatışmazlığının törətdiyi fəsadlardan, xüsusilə iqlimin getdikcə istiləşməsinin planetimiz üçün törədəcəyi təhlükələrdən və digər məsələlərdən danışılmış və Avropa Şurası bu problemlərin vaxtında həlli üçün bütün imkanlarından istifadə etməyə çağırılmışdır.
Müzakirələrdə çıxış etmiş Azərbaycan nümayəndə heyətinin üzvü Qənirə Paşayeva məruzəçinin hər il Avropada meşə yanğınlarının ətraf mühitə, ekologiyaya təsiri barədə fikirləri və qətnamə layihəsində irəli sürülmüş təklifləri dəstəklədiyini bildirmiş, Avropanın bir hissəsi olan Azərbaycanda ildən-ilə bu sahədə vəziyyətin daha acınacaqlı hal almasına, meşələrimizin 247352 hektarlıq sahəsinin Ermənistanın və Dağlıq Qarabağ separatçı rejiminin işğal altında olması faktını diqqətə çəkmiş, 10 il müddətində ermənilərin işğal etdikləri ərazilərimizdəki meşələri, qiymətli və nadir ağac növlərini qıraraq Ermənistana və dünyanın bir çox ölkələrinə aparıldığını qeyd etmişdir. Azərbaycanlı deputat göstərmişdir ki, meşə sahələrinin böyük əksəriyyəti işğalçı qüvvələr tərəfindən yandırılır və ekologiyaya ciddi zərər vurulur, ərazilərimiz, sözün əsil mənasında, ekoloji terrora məruz qalır.
Deputat Ermənistanın yeni təxribata əl ataraq, təmas xəttində yerləşən Ağdam, Füzuli, Cəbrayıl, Tərtər və Xocavənd rayonlarının işğal altında olan ərazilərində iyul ayının əvvəlindən başlayaraq genişmiqyaslı yanğınlar törətdiklərini, min hektarlarla sahəni əhatə etmiş yanğınların yaxınlıqdakı ərazilərə yayılaraq ətraf mühitə və canlı təbiətə ciddi ziyan vurduğunu xüsusi vurğulamışdır.
Hesablamalara görə, təkcə son yanğınlar nəticəsində ətraf mühitə milyonlarla dollar məbləğində ziyan dəydiyini qeyd edən Q.Paşayeva, təcili tədbirlər həyata keçirilməzsə və işğal olunmuş Azərbaycan ərazilərində erməni silahlı qüvvələrinin törətdiyi vəhşiliklərin qabağı alınmazsa, bir çox flora və fauna növlərinin nəslinin kəsilmək təhlükəsi ilə üzləşəcəyini söyləmişdir. Azərbaycan kəndlərinin ermənilər tərəfindən daima olaraq atəş altında saxlanılması səbəbindən alovun sürətlə yayılmasının qarşısını almaq qeyri mümkündür. Bu proses getdikcə daha da sürətlənir, ətraf mühitə, ekologiyaya ciddi ziyan vurulur.
Hadisələrin bu cür inkişafında Ermənistan rəsmilərinin xüsusi rol oynadığını vurğulayan deputat, Azərbaycan və Ermənistan prezidentləri arasında birbaşa və ATƏT-in Minsk qrupunun iştirakı ilə danışıqların davam etdirildiyi bir vaxtda İrəvan rəsmilərinin işğal altındakı Dağlıq Qarabağ bölgəsinə mütəmadi olaraq səfərlər edərək, vəziyyəti daha da gərginləşdirdiklərini, sülh danışıqlarına ciddi surətdə mənfi təsir edən açıqlamalar verərək, separatçı rejimi daha da qızışdırdığını və yeni təhlükəli addımlar atmağa sövq etdiklərini bildirmiş və buna dair təkzibolunmaz faktlar gətirmişdir.
Deputat bildirmişdir ki, Ermənistan prezidenti Robert Koçaryan may ayının 8-də Azərbaycanın Şuşa şəhərinin işğalı günü ilə əlaqədar separatçı erməni rejiminə təbrik məktubu göndərmiş, baş nazir Andranik Marqaryan, müdafiə naziri və təhlükəsizlik şurasının rəhbəri Serj Sarkisyan isə Şuşaya gələrək separatçılar qarşısında çıxış edərək, problemin sülh yolu ilə həllinə mənfi təsir edən açıqlamalar vermişlər.
Bütün bunlar onu göstərir ki, rəsmi İrəvan beynəlxalq təşkilatların münaqişənin həlli ilə bağlı qərar və qətnamələrinə məhəl qoymur. İndiyədək Ermənistan Avropa Şurası qarşısında götürdüyü öhdəliklərə əməl etmir, silahlı qüvvələri nəinki işğal etdikləri ərazilərdən çıxarmır, hətta bir qədər də irəli gedərək, Azərbaycanın işğal altındakı ərazilərini yandırırlar. Bu faktları avropalı deputatların diqqətinə çatdıran Q.Paşayeva Azərbaycan nümayəndə heyəti adından AŞPA-dan bu cür halların qarşısını almaq üçün konkret addımlar atmağı xahiş etmişdir. O bildirmişdir ki, əks halda bu bölgə Avropanı ciddi narahat edə biləcək ekoloji fəlakət zonasına çevrilə bilər.
Bununla da AŞPA-nın yay sessiyası öz işini başa çatdırmışdır.
Bölmənin digər xəbərləri
