Ermənilərin Ordumuzun mövqeləri qarşısında quraşdırmağa cəhd etdikləri fortifikasiya qurğuları nədir?
Ordumuz bu qurğuların quraşdırılması cəhdlərinin qarşısını hər zaman qətiyyətlə alır
Bakı, 12 iyun, AZƏRTAC
Son günlər davamlı olaraq həm şərti dövlət sərhədində ordumuzun mövqeləri atəşə tutulur, həm də Azərbaycanın ərazisində müvəqqəti yerləşdirilmiş Rusiya sülhməramlı kontingentinin məsuliyyət zonasında qanunsuz erməni silahlı dəstələri hərbi təxribatlar törədirlər. Belə ki, Azərbaycan Müdafiə Nazirliyinin son məlumatlarına əsasən, qanunsuz erməni silahlıları kənd təsərrüfatı işləri adı altında Ordumuzun Ağdam, Füzuli, Xocalı, Xocavənd və Şuşa rayonları istiqamətlərindəki mövqelərinin qarşısında uzunmüddətli fortifikasiya qurğularını quraşdırmağa cəhd göstəriblər. Lakin Azərbaycan Ordusunun bölmələrinin gördükləri təxirəsalınmaz tədbirlər nəticəsində aparılan bu işlər dərhal dayandırılıb. Son bir neçə gündə Qarabağda rus sülhməramlıların müvəqqəti məsuliyyət bölgəsindəki qanunsuz erməni silahlı birləşmələrinin fortifikasiya qurğuları qurmasına cəhd etməsinin qarşısı Azərbaycan Ordusunun bölmələrinin adekvat cavab tədbirləri görülməklə qətiyyətlə alınır.
Bu fikirləri AZƏRTAC-a açıqlamasında hərbi ekspert Ədalət Verdiyev söyləyib.
Ədalət Verdiyev deyib ki, ümumiyyətlə fortifikasiya sözü, silah və texnikaların səmərəli istifadəsini, qoşunların davamlı idarəetməsini təmin edən, şəxsi heyətin və mülki əhalinin mühafizəsi mənasını verir. Fortifikasiya qurğuları qoşunların yerləşdirilməsi, silah, hərbi texnika, komanda məntəqələrinin ən səmərəli istifadəsi, habelə qoşunların, əhalinin və ölkənin arxa cəbhəsinin obyektlərinin müdafiəsi üçün nəzərdə tutulmuş istehkam tikililəridir. Bu qurğular səhra və uzunmüddətli olmaqla iki yerə bölünür. İstehkam tədqiqatları konstruksiyaların hazırlanmasını, səhra və uzunmüddətli istehkamların qurulmasını və istifadəsi üsullarını özündə ehtiva edir.
“Bu qurğuların inşası qanunsuz erməni silahlı dəstələrin müqavimət gücünü artırmaq məqsədi daşıyır. Həmin qurğuların inşası birmənalı olaraq Qarabağdakı Ermənistan ordusunun qalıqlarının və qanunsuz hərbi birləşmələrin Azərbaycana qarşı müdafiə olunmaq potensialını daha da gücləndirmək üçün nəzərdə tutulur. Erməni terrorçularının Rusiya sülhməramlılarının müvəqqəti nəzarətində olan Azərbaycan ərazilərində intensiv olaraq fortifikasiya qurğularının inşasının əsas hədəfi bu terrorçu qüvvələrin ordumuza qarşı müqavimət potensialını bərpa etmək və daha uzun müddət ölkəmizə qarşı döyüş əməliyyatları aparmaq imkanını əldə etməkdir. Əgər onların inşasının qarşısı vaxtında alınmasa, gələcəkdə işğalçı ölkənin qanunsuz dəstələri döyüş potensialını qismən bərpa edə bilər. Buna görə də düşmən tərəfindən istənilən mühəndis və fortifikasiya qurğularının inşa edilməsinin qarşısı qətiyyətlə əngəllənməli, onlar darmadağın edilməlidir”, - deyə hərbi ekspert vurğulayıb.
Onun sözlərinə görə, ümumiyyətlə, erməni tərəfinin Azərbaycanla Ermənistan arasında danışıqların aparıldığı ərəfədə atəşkəsi pozmaq ənənəsinə sadiq qalacağı ehtimalı daha böyükdür. Həmin görüşlər ərəfəsi və sonrasında da ermənilər “ənənələrinə” sadiq qalırlar. Bu ermənilərin hiyləgər niyyətlərinin bir hissəsidir. Yəqin ki, iyulun 21-də Brüsseldə keçiriləcək yüksək səviyyəli üçtərəfli formatda görüşədək ermənilər hər gün təxribat xarakterli fəaliyyətlərini davam etdirəcəklər. Buna görə də, ordumuz hər zaman ayıq-sayıq olmalıdır. Düşmənin təxribat törədildiyi mövqelərə qarşı sərt addımlar atılması barədə Müdafiə Nazirliyinin keçirdiyi son iclasda tapşırıqlar verildi. Bu müşavirədə təxribatların qarşısının alınması üçün təsirli tədbirlər görülməsi qərara alındı. Müdafiə naziri Ali Baş Komandan tərəfindən qarşıya qoyulan tapşırıqları, Ordumuzun üzərinə düşən bütün vəzifələri layiqincə yerinə yetirmək, eləcə də mümkün təxribatların qarşısını dərhal və qətiyyətlə almağa hər an hazır olmaq barədə konkret göstərişlər verib.
Digər tərəfdən hesab edirəm ki, belə sərt tədbirlərin görülməsi bəlkə də erməni tərəfinin təxribatlarını müəyyən müddətə təxirə sala bilər. Qarabağ ərazisindəki erməni silahlı separatçıların belə təxribatlarının qarşısının alınmasının səmərəli üsulu atəşkəsi pozan düşmən mövqelərini darmadağın etmək, yeni fortifikasiya qurğularının yaradıldığı əraziləri daim atəş altında tutmaqdır.
Xatırladaq ki, ümumiyyətlə fortifikasiya mühəndis-istehkam işləridir. Müdafiə xəttində atəş mövqeləri və yaxud mühəndis-istehkam qurğuları, səngərlər hamısı kompleks şəkildə hərbi termin kimi fortifikasiya işlərinə aiddir. Yəni Ermənistan ordusunun şərti sərhəddə apardığı bu qazma işləri ilk növbədə atəş vasitələrindən daha yaxşı istifadə etmək, öz şəxsi heyətini qorumaq və ordumuza qarşı növbəti də təxribat törətmək məqsədi güdür. Lakin bölmələrimizin gördüyü təxirəsalınmaz tədbirlər nəticəsində aparılan həmin işlər dərhal dayandırılır. Beləliklə, gələcəkdə törədilə biləcək təxribatların qarşısı əzmkarlıqla alınır.
Bölmənin digər xəbərləri
