Ermənistan fundamental insan hüquqlarının ən kobud şəkildə pozulduğu ölkələrdən biridir
Bakı, 19 iyun, Səadət Hakıyeva, AZƏRTAC
Dünyaya ağalıq iddiasında olanların sözü ilə oturub-durmayan, öz müstəqil inkişaf xətti ilə addımlayan ölkələrə münasibətdə hər zaman ikili, üçlü standartlar mövcud olub. Belə ölkələrə qarşı ədalətsiz, haqsız mövqe nümayiş etdirilib. Bunu hər zaman müstəqil dövlətçilik və inkişaf xətti ilə addımlayan, qısa zaman kəsiyində dünyanın lider dövlətlərindən birinə çevrilən ölkəmizə qarşı münasibətdə açıq şəkildə görmüşük. Çox təəssüflər olsun ki, dünya birliyi, aparıcı beynəlxalq qurumlar, Qərb, Avropa təşkilatları tərəfindən bu münasibət bu gün də müxtəlif formalarda davam etməkdədir.
Bu fikirləri AZƏRTAC-a açıqlamasında Milli Məclisin deputatı, professor Kamilə Əliyeva söyləyib.
K.Əliyeva diqqətə çatdırıb ki, belə qüvvələr hər fürsətdə Azərbaycana ləkə, böhtan atmağa, onun imicinə, nüfuzuna kölgə salmağa çalışır və guya ölkəmizdə demokratiyanın, insan hüquqların pozulduğunu iddia edirlər. Lakin təxminən 30 ildir ən adi hüquqları belə pozulmuş, tapdanmış bir milyona yaxın azərbaycanlının, qaçqın və məcburi köçkünün hüquqları haqqında bir kəlmə də danışmır, bunu edən işğalçı və təcavüzkar Ermənistana “qaşın üstə gözün var” demirlər. Halbuki, bu, onların birbaşa borcu, vəzifəsi, işidir. Ancaq onlar hər zaman işğalçı və təcavüzkar Ermənistanın mövqeyindən çıxış edir, ona dəstək nümayiş etdirir və bununla da özlərinin əsl mahiyyətlərini açıb ortaya qoyurlar. “Özünüz də görürsünüz ki, işğalçı və təcavüzkar ölkədə nələr yaşanır. Bir-birini əvəz edən hakimiyyət, hərbi xunta, cinayətkar rejimlər öz xalqlarının belə hüquqlarını hər gün pozmaqda, tapdalamaqdadırlar. Demək olar ki, hər gün Ermənistanda insanların hüquqları açıq-aşkar tapdalanır, onların fiziki məhvindən belə çəkinilmir. “Demokrat” libasında “zühur” edən Nikol Paşinyan da demokratik dəyərlərin, insan hüquqlarının pozulması və tapdalanmasında özündən əvvəlkilərdən - hərbi canilərdən - köçəryanlardan, sarkisyanlardan heç nə ilə fərqlənmir, əksinə, öz antidemokratikliyi, qəddarlığı ilə onlardan daha irəlidə gedir”, - deyə K.Əliyeva vurğulayıb.
O, Paşinyanın hakimiyyətə gəldiyi gündən bütün siyasi rəqiblərinə qarşı repressiya, təqib siyasəti həyata keçirdiyini bildirib. Qeyd edib ki, işğalçı ölkənin baş naziri hətta onu hakimiyyətə gətirən, lakin son zamanlar bəzi məsələlərdə mövqeləri uzlaşmayan tərəfdaşlarını da eyni üsullarla siyasətdən təcrid etmək, təqib və təzyiq yolunu tutub. İyunun 16-da “Çiçəklənən Ermənistan” Partiyasının sədri, Ermənistan parlamentindəki “Sarukyan” fraksiyasının lideri, milyonçu Qaqik Sarukyanın deputat toxunulmazlığı parlament tərəfindən ləğv edilib. O, ölkənin təhlükəsizlik qüvvələri tərəfindən ifadə vermək üçün istintaqa cəlb edilib və həbsi də istisna olunmur. Səbəb isə Sarukyanın məhz Paşinyanı tənqid etməsidir. Paşinyan hakimiyyətini tənqid etməsindən sonra təzyiqlərə məruz qalması baş verənlərin birbaşa siyasi təqib olduğunu sübut edir.
“Ümumiyyətlə, hazırda Ermənistan fundamental insan hüquqlarının ən kobud şəkildə pozulduğu ölkələrdən biridir. Bunu yerli hüquq müdafiəçiləri də öz hesabatlarında ətraflı şəkildə göstərirlər. Bəs, beynəlxalq hüquq müdafiə təşkilatları, Qərbin aparıcı qurumları necə? Əfsuslar olsun ki, adlarını çəkdiyim qurumlar da daxil olmaqla, digər beynəlxalq təşkilatlar, hüquq müdafiə təşkilatları Ermənistanda baş verən hadisələrlə, repressiyalarla bağlı bir kəlmə də danışmırlar. Hər şeyi yenə görməzdən gəlir, özlərini karlığa, korluğa, lallığa vururlar, susurlar, heç bir münasibət bildirmirlər. Bəs, onların elan etdikləri, car çəkdikləri dəyərlər, insan hüquqlarının aliliyinin təmin edilməsi, demokratik azadlıqların qorunması harada qaldı? Niyə özlərinin elan etdikləri, ortaya qoyduqları dəyərlərinə qarşı bu qədər dəyərsiz və hörmətsiz mövqe nümayiş etdirirlər? Səbəb aydındır. Paşinyanı hakimiyyətə gətirən dairələr, Qərbdəki, Avropadakı mərkəzlər, güclər və onların təsirində olan həmin beynəlxalq qurumlar, “hüquq müdafiəçiləri” hələ də Paşinyanın hakimiyyətdə qalmasında maraqlıdırlar. Onları öz maraqları düşündürür və bu səbəbdən də susurlar, münasibət bildirmirlər. Əslində isə qeyd etdiyimiz kimi, demokratik dəyərləri özü üçün əsas amil seçən beynəlxalq təşkilatlar Ermənistandakı proseslərə nəinki çoxdan münasibət bildirməli idi, hətta bu ölkə rəsmiləri üçün sanksiya çağırışları etməli idilər, - deyə K.Əliyeva qeyd edib.
Deputat bildirib ki, Ermənistandakı bu durum uzun müddət davam edə bilməz. İstər Paşinyan iqtidarını, istərsə də Ermənistan cəmiyyətini daha böyük fəlakətlər və sarsıntılar gözləyir. Bu, qaçılmazdır. Ermənistan cəmiyyətinin ancaq bir çıxış yolu var : şovinist, faşist ruhlu siyasətçilərdən birdəfəlik üz döndərmək, onları tarixin zibilxanasına atmaq və Azərbaycanla normal qonşuluq, dinc yanaşı yaşamaq kursuna üstünlük vermək. Onların nicatı yalnız Azərbaycanla münasibətlərin yaxşılaşdırılmasından keçir və bunun üçün də Ermənistan qoşunları işğal altındakı ərazilərdən birdəfəlik çıxarılmalı, ədalətli sülhə razılıq verilməlidir. Başqa yol yoxdur.
Bölmənin digər xəbərləri
