Ermənistan sonuncu şansını itirə bilər
Bakı, 14 sentyabr, Pərvanə Qarayeva AZƏRTAC
Azərbaycanın Ermənistana dəfələrlə xəbərdarlıq etdiyi hadisə baş verdi. Sentyabr ayının əvvəlindən başlayaraq Ermənistan silahlı qüvvələri demək olar ki, hər gün məqsədyönlü şəkildə, inadkarcasına Azərbaycanın mövqelərini atəşə tutur, onu provokasiyaya çəkməyə çalışırdı. Bakı hər gün daha ciddi şəkildə xəbərdarlıq edir, “Keçinin əcəli çatanda çobanın dəyənəyinə sürtüşər” məsəlini unutmamağı məsləhət görür, əks halda nəticələrin onlar üçün ağır olacağını, avantüristlər üçün kədərli sonluqla bitmiş əvvəlki hadisələrdə məsələnin yeni məzarlarla sona çatdığını xatırladırdı. Ermənistan rəhbərliyi isə əvvəllər olduğu kimi bu dəfə də öz hərbi qulluqçularının həyatına, anaların göz yaşlarına məhəl qoymadan bir daha bəxtini sınamağı, bəlkə də Azərbaycan tərəfin əzmkarlığını yoxlamağı qərara aldı.
Azərbaycan rəhbərliyi Ermənistanda “ruletka” oyunu həvəskarlarının ağlını başına toplayacağına ümid edərək son həddə qədər gözlədi. Bəzən adama elə gəlirdi ki, Bakıda lazım olandan daha çox gözləyir, erməni əsgərlərinin həyatı barədə Ermənistanın özünün hərbi və siyasi rəhbərliyindən daha artıq qayğıkeşlik göstərirlər.
Lakin hər bir səbrin sonu olur. Bu dəfə də Ermənistanın nəhayətsiz provokasiyalarına Azərbaycanın gözlənilən cavab reaksiyası “heyrət” doğurdu. Yəni, “bu necə ola bildi!”, “axı biz müstəqil dövlətik!”, “KTMT haraya baxır?”, “BMT haraya baxır?”.
Bəs siz BMT-nin Nizamnaməsini yaxşı oxumusunuzmu? Dövlətin özünümüdafiə hüququ haqqında 51-ci maddəni gözdən qaçırmamısınız ki? Azərbaycan Silahlı Qüvvələri uzun-uzadı xəbərdarlıqdan sonra legitim hədəflərə - təqribən on gün müddətində bizim mövqelərin atəşə tutulduğu atəş nöqtələrinə cavab zərbəsi endirdi. Macəra axtaranların hərbi infrastrukturuna ağır zərbə vuruldu. Azərbaycan Ordusunun mövqelərini atəşə tutan hərbi hissələr, atəş mövqeləri, postlar, Ermənistan silahlı qüvvələrinin xeyli sayda hərbi qulluqçusu məhv edildi.
Bizim döyüşçülər də döyüş tapşırığını yerinə yetirərkən qəhrəmancasına həlak oldular. Məkanları cənnət olsun!
Ermənistan rəhbərliyi başa düşməlidir ki, provokasiyaların davam etdirilməsi, bu ölkənin öz üzərinə götürdüyü öhdəliklərlə bağlı “şıltaqlıqlar” daha ağır nəticələrə gətirib çıxara bilər. Gələcək sülh barədə düşünməyin vaxtıdır. Prezident İlham Əliyev artıq xəbərdarlıq edib ki, bizim təkliflərimiz əbədi deyil. Elə bir məqam yetişə bilər ki, Ermənistana bugünkü təkliflərimiz daha təkrar olunmayacaq.
Ermənistan şansını itirməyə çox yaxındır. Bu, bəlkə də onun üçün sonuncu şansdır.
Bölmənin digər xəbərləri
