Ermənistanın törətdiyi təxribatlar həmin ölkənin təcavüzkar mövqeyinin sübutudur ŞƏRH
Bakı, 15 sentyabr, AZƏRTAC
Təcavüzkar Ermənistanın silahlı qüvvələrinin diversiya qrupları tərəfindən ötən ilin sentyabrında Azərbaycanın Daşkəsən, Zəngilan, Kəlbəcər və Laçın rayonları ilə sərhəddə törədilən genişmiqyaslı təxribatların ildönümüdür. 44 günlük Vətən müharibəsində Müzəffər Ali Baş Komandan, Prezident İlham Əliyevin rəhbərliyi ilə rəşadətli Azərbaycan Ordusunun qəhrəmanlığı və xalqımızın milli birliyi ilə otuz illik işğala son qoyulsa da erməni təxribatı hələ də davam edir. Haqq savaşımızda Ermənistan rüsvayçı məğlubiyyətə uğrasa da bundan dərs almayıb və bu gün də Azərbaycan, o cümlədən bölgə üçün təhlükə mənbəyidir. 2020-ci il noyabrın 10-da və 2021-ci il yanvarın 10-da Rusiya, Azərbaycan və Ermənistan arasında imzalanmış üçtərəfli bəyanatlara baxmayaraq, Ermənistanın bu günədək törətdiyi təxribatlar və revanşist qüvvələrin cinayətləri həmin ölkənin təcavüzkar mövqeyini bir daha sübut edir.
Bu fikri Milli Məclisin deputatı Məlahət İbrahimqızı AZƏRTAC-a açıqlamasında söyləyib.
Deputat bildirib ki, Azərbaycan işğal dövründə münaqişənin danışıqlar yolu ilə həll olunmasına çalışdı, məsələyə sülhməramlı mövqedən yanaşdı. Lakin təcavüzkar dövlət heç vaxt bu cəhdlərə əhəmiyyət vermədi. Hətta BMT-nin və bir sıra beynəlxalq təşkilatların qəbul etdiyi heç bir sənədə məhəl qoymadı. Onların təxribatları 44 günlük müharibənin başlaması və son nəticədə acizanə şəkildə ağ bayraq qaldırmaları ilə yekunlaşdı. Qarşı tərəf bundan sonra da ağıllanmadı, havadarlarının, separatçıların şirin vədlərinə aldanıb ara-sıra özlərinə yaraşan namərdliklər törətməyə davam etdilər. Ötən ilin sentyabr təxribatları da onların növbəti riyakarlıqlarının və xalqımıza qarşı bitməyən nifrətlərinin göstəricisi idi. O zaman “Dəmir yumruq” zərbəsi alan Ermənistan kor-peşman geri çəkilməli oldu.
M.İbrahimqızının sözlərinə görə, maraqlısı odur ki, Ermənistan heç bir vəchlə öz revanşist əməllərindən əl çəkmir, bununla yanaşı, ikili oyunlar oynamağa cəhd edir: “Belə ki, gah bölgədə sülh və əmin-amanlığın bərpa olunması, iki ölkə arasında münasibətlərin tənzimlənməsi məqsədilə sülh müqaviləsinin imzalanmasına razı olduqlarını bəyan edirlər, gah da təxribatları davam etdirirlər. Təcavüzkar siyasətindən əl çəkməyən Ermənistan sülh müqaviləsini imzalamaqdan yayınır. Bunun da əsas səbəbi 2020-ci il noyabr və 2021-ci il Moskva bəyanatlarında əks olunduğu kimi Zəngəzur dəhlizinin inşa olunub açılmasıdır. Çünki Azərbaycan Prezidentinin Ermənistana verdiyi təkliflərdə də və eləcədə müqavilələrdə də əks olunmuş ən əsas təkliflərdən biri Zəngəzur dəhlizinin tezliklə istifadəyə verilməsidir. Sonuncu Brüssel görüşündə hətta Avropa İttifaqı Şurasının Prezidenti Şarl Mişel görüşün nəticəsi olaraq öz bəyanatında bütün kommunikasiyaların açılmasında irəliləyişə nail olunduğunu deyib. Eyni zamanda, Şarl Mişel və yaxud başqa təşkilatlar tərəfindən Prezident İlham Əliyevin irəli sürdüyü təkliflərə qarşı yeni təkliflər irəli sürülməyib. Yəni dövlətimizin başçısının irəli sürdüyü təkliflər o qədər ədalətli, mükəmməl, obyektivdir ki, təkcə Azərbaycanın deyil, bütövlükdə bölgənin marağına xidmət edir. Biri var qondarma, təcavüzkar, işğalçı Ermənistan dövləti, biri də var dünya erməni diasporu, erməni lobbisi. Erməni lobbisi Azərbaycanın əldə etdiyi möhtəşəm Zəfəri və gündən-günə sürətlə inkişaf edən və Avropanın ən önəmli, etibarlı tərəfdaşı olan ölkəmizin nailiyyətlərini görmək istəmir. Buna görə də Ermənistana, Paşinyana təzyiq edirlər. Nəticədə Ermənistanda qarışıq bir situasiya yaranıb. Ona görə də erməni revanşistləri, eləcə də Ermənistanın ordusu daxilində olan müxtəlif qruplaşmalar vaxtaşırı müxtəlif yerlərdə hərbi təxribatlar törətməyə davam edirlər. Hər dəfəsində də sarsılmaz “Dəmir yumruq” öz yerində olduğunu göstərib.
Prezident İlham Əliyev dəfələrlə çıxışlarında bildirib ki, bundan sonra təcavüzkar niyyətli, işğal niyyətli hər hansı bir qüvvə Ermənistanda baş qaldırsa, o başı necə lazımdırsa, əzəcəyik. Həmin qüvvələr baş qaldırdıqca “Dəmir yumruğun” zərbəsini dadırlar. Lakin faydası yoxdur. Bunun səbəbi nədir? Çox təəssüf ki, Fransada olan erməni diasporu, fransız siyasətçiləri, fransız dövlət adamları, bir sözlə Ermənistanı öz alətinə çevirən qüvvələr buna imkan vermirlər. Həmin qüvvələr Ermənistana ağıl verməkdənsə, əksinə bir az da qızışdırırlar və bu da regionun dayanıqlı sülhünə zərbə vurur, iki ölkə arasında bağlanacaq sülh müqaviləsini ləngidir, eləcə də Zəngəzur dəhlizinin açılmasına ciddi problem yaradır. İstər ötənilki sentyabr təxribatları, eləcə də son aylarda Laçın dəhlizi ətrafında süni yaradılmış, həmçinin Ermənistan ordusunun müxtəlif istiqamətlərdə bölmələrimizi atəşə tutması faktları erməni xislətinin dəyişməzliyini göstərir. Sözsüz ki, belə təxribatlar Azərbaycanı öz haqlı yolundan döndərə bilməz. Onların hər dəfə törətdiyi təxribat və şantaj Prezident İlham Əliyevin həyata keçirdiyi müdrik diplomatiyası ilə beynəlxalq aləmdə ifşa olunur. Dövlətimizin başçısı bütün dünyaya bəyan edib ki, II Qarabağ savaşından sonra qalan bütün problemlər sülh və danışıqlar yolu ilə həll ediləcək. Törədilən hər bir təxribatın qarşısı isə Silahlı Qüvvələrimizin qəhrəman hərbi qulluqçuları tərəfindən məharətlə alınır. Bundan sonra da istənilən riyakarlığa adekvat cavablar veriləcək”.
Bölmənin digər xəbərləri
