EYVANDA BAĞ
Hər şey isə belə başlanıb: 10 il əvvəl, 1997-ci ildə aşağı mərtəbədə yaşayan qonşu yaşayış sahəsini eyvanın hesabına genişləndirməyə başladı. Quliyevlər ailəsinin eyvanı qarşısında geniş sahə yarandı. Elə bu möcüzəli yaşıllığı da Böyükağa müəllim orada salmışdır. Quliyevlər ailəsi, ilk növbədə, ailə başçısı və onun xanımı Tamilla yaşıllığa həvəslə qulluq edirlər. Böyükağa müəllim deyir:
-Bu cür təsərrüfata qulluq etmək asan iş olmasa da, mənə zövq verir. Mən təbiəti çox sevirəm.
Ümumiyyətlə, 8-ci mikrorayon Bakının digər rayonlarından yaşıllığı ilə fərqlənir. Bura Quliyevlər ailəsi kimi həvəskarların hesabına yaşıl vahəyə çevrilmişdir.
Böyükağa müəllim həkim-loqopeddir, uşaqlarda nitq qüsurlarını müalicə edir. İşi başından aşsa da, eyvandakı bitkiləri yaddan çıxarmır, üstəlik, həyətdəki ağacları da qayğısız qoymur. Deyir ki, həyətdəki bütün ağaclar 1971-ci ildə əkilmişdir. Biz buraya təzə köçəndə ətraf düzənlik idi. İməcilik təşkil etdik, tinglər gətirib əkdik. İndi ağaclar böyüyüb, az qala doqquzmərtəbəli ev hündürlüyündədir. Onlar mikrorayonumuzun bəzəyidir.
Kaş, gözəl Bakımızın hər yeri beləcə yaşıllıqlar içində olaydı!
