Faiq İsmayılov: Avropa Parlamenti Azərbaycana qarşı qərəzli siyasət yeridir
Bakı, 12 mart, AZƏRTAC
Qarabağ və Şərqi Zəngəzur 30 ilə yaxın Ermənistan silahlı qüvvələrinin işğalı altında olub. Məhz ermənilər tərəfindən bu müddət ərzində Qarabağda və ona bitişik ətraf ərazilərdə Azərbaycan xalqının mədəni irsinə qarşı mədəniyyətin soyqırımı həyata keçirilib.
AZƏRTAC xəbər verir ki, bunu martın 10-da Avropa Parlamenti tərəfindən qəbul olunan “Erməni mədəni irsinin məhv edilməsi” ilə bağlı qətnaməni şərh edən “Abidələri Müdafiə Təşkilatı” İctimai Birliyinin sədri Faiq İsmayılov deyib.
O qeyd edib ki, son 30 ildə Ermənistanın apardığı təcavüzkar siyasət nəticəsində xalqımızın yüz mindən çox daşınan mədəni irs nümunələri qənimət kimi Ermənistana aparılaraq mənimsənilmiş, 747 arxeoloji abidə, 64 monumental qurğu və 1814 memarlıq abidəsi işğal dövrü ermənilərin mədəni irs nümunələri kimi təbliğ edilmiş, o cümlədən 800-dən çox tarixi əhəmiyyətli qəbiristanlıq dağıdılmış, 200 monumental qurğu və heykəltaraşlıq nümunələri məhv edilmiş, xristianlıq dövrünə qədər olan 150 memarlıq nümunələri sovmələr, bazilikalar, inzibati binalar dağıdılmış, 68 məscid tamamilə, 4 məscid qismən dağıdılaraq yararsız hala salınmış, 182 inanc yeri, pir və ziyarətgah tamamilə məhv edilmiş, 346 yaşayış evi, saraylar dağıdılaraq yararsız hala salınmış, alban dövrünə aid 250 memarlıq abidəsi üzərindəki yazılar, bədii daş nümunələri, xaç daşları üzərindəki ornamentlər dəyişdirilərək saxtalaşdırılmış, 50 məbəd və bazilika öz orijinal görkəmindən məhrum edilərək erməniləşdirilib.
Faiq İsmayılov qeyd edib ki, proseslərin getdiyi dövrdə tərəfimizdən dəfələrlə beynəlxalq təşkilatlara işğal altındakı ərazilərdəki mədəni-irs nümunələrinə baxış keçirilməsi xahiş olunsa da, Azərbaycana qarşı olan ikili standartlar bu ərazilərdə monitorinq keçirilməsinə mane olub.
Azərbaycan ərazilərində erməni mədəni irs nümunələrinin olduğunu iddia etmək, Avropa Parlamenti tərəfindən Azərbaycana qarşı növbəti yalan, iftira, böhtan və riyakarlıqdır. Avropa parlamentariləri 1828-ci il Türkmənçay sülh müqaviləsindən sonra rus çarı Nikolayın sərəncamı ilə Cənubi Qafqazda alban xalqının mədəni irsinin ermənilərə həvalə edildiyini ola bilsin ki, unudublar. Məhz bu sərəncamdan sonra ermənilər Azərbaycan torpaqlarında alban mədəni dəyərlərini erməniləşdirməyə başladılar. Əgər parlamentarilər bu hadisəni unutmasaydılar, alban xalqının mədəni irsinin ermənilərə məxsusluğunu iddia etməklə böyük səhvə yol verməzdilər.
“İndiki Ermənistan adlandırılan ərazilərdən 20-ci yüzilliyin əvvəllərindən kütləvi deportasiyalar nəticəsində 500 min azərbaycanlı etnik təmizləməyə məruz qalıb. Sonuncu deportasiya 1988-ci ildə həyata keçirilib, bunun da nəticəsində 250 mindən çox azərbaycanlı öz doğma yurdlarından qovulub.
Beləliklə, Ermənistan məqsədyönlü şəkildə həm etnik, həm də mədəni soyqırımı siyasəti aparmaqla bu ərazilərin tarixi və əzəli sakinləri olan azərbaycanlıların izlərini hər yerdən silir, Azərbaycan xalqının mədəni irsini talayır, dağıdır, özününküləşdirir və mənşəyini dəyişdirir. Bununla bərabər sözügedən ərazilərdəki qədim toponimlərin erməni adları ilə əvəzlənməsi də həyata keçirilib. Bu etnik təmizləmə nəticəsində azərbaycanlıların əmlakı və mədəni irs nümunələri ermənilər tərəfindən mənimsənilib, - deyə F.İsmayılov vurğulayıb.
O bildirib ki, indiki Ermənistan ərazisində Azərbaycana məxsus 3500 tarix və mədəniyyət abidəsi, 500 qəbiristanlıq, 391 məscid ermənilər tərəfindən dağıdılaraq yox edilib.
“Köhnə Xot, Köhnə Şinuayr, Köhnə Əlidərə kəndlərində 900-dən çox tarix və mədəniyyət abidəsinin xarabalıqları bizə şahidlik edir. Sanki bu ərazidə cəhənnəmlə cənnətin mübarizəsi gedib. Bu kəndlərdə ermənilər tərəfindən 900-dən çox tarix və mədəniyyət abidəsi, yaşayış evləri, məscidlər, alban dövrünə aid bazilika və sovmələr, bədii daş nümunələri, qəbirüstü abidələr, qəbir daşları, at və qoç fiqurları dağıdılaraq yararsız hala salınıb. Ərazi Azərbaycanın mədəni-irs nümunələrindən təmizlənərək vandalizmə yol verilmişdir. Bütün bunlardan sonra əminliklə demək olar ki, Avropa Parlamenti Azərbaycana qarşı qərəzli siyasət yeridir”, - deyə “Abidələri Müdafiə Təşkilatı” İctimai Birliyinin sədri fikrini yekunlaşdırıb.
Bölmənin digər xəbərləri
