FAO-nun nümayəndəsi: Azərbaycan üçün iqlim dəyişmələrinə adaptasiya ən önəmli məsələdir
Bakı, 11 sentyabr, AZƏRTAC
İqlim dəyişmələri artıq sabahın problemi deyil, bu günün reallığıdır, biz bunu hiss edirik. Azərbaycan üçün ən önəmli məsələ, düşünürəm ki, adaptasiyadır.
AZƏRTAC xəbər verir ki, bunu Birləşmiş Millətlər Təşkilatının Ərzaq və Kənd Təsərrüfatı Təşkilatının (FAO) Azərbaycan ofisinin rəhbərinin müavini Bariz Mehdiyev Bakıda "EkoSfera" Ekoloji-Sosial Mərkəz İctimai Birliyinin təşkilatçılığı ilə keçirilən "II LCOY Azərbaycan 2026 - II İqlim Dəyişikliyi üzrə Gənclərin Lokal Konfransı"nda çıxışı zamanı deyib.
O bildirib ki, FAO-nun 10 illik strategiyasının iki əsas prioritet istiqaməti var və bunlardan ən başlıcası adaptasiyadır.
“Artıq iqlim dəyişir, bu, reallıqdır. 1, 5 dərəcə temperatur artımının qarşısını almaq real görünmür. Təbii ki, ölkələr, xüsusilə inkişaf etməkdə olan və zəif inkişaf etmiş ölkələr buna hazırlıqlı olmalı, adaptasiya tədbirləri həyata keçirməlidirlər. Bu, suvarma suyunun azalması, torpaqların deqradasiyası və digər məsələləri əhatə edir. Azərbaycanın qlobal səviyyədə istixana effekti yaradan emissiyalarda payı cəmi 0,1 faizdir. Biz əsasən fokusu adaptasiyaya verməliyik”, - deyə o bildirib.
Bariz Mehdiyev vurğulayıb ki, FAO qlobal təşkilat olaraq hesabatlar hazırlayır və bu sənədlərdə iqlim dəyişmələrinin təsirləri ilə bağlı kifayət qədər acı göstəricilər yer alır: “1,5 dərəcə temperatur artımından təsirlənən dünyada insanların sayı artıq 5 milyarddan çoxdur və 3 milyard hektardan çox ərazi artıq bu təsirə məruz qalıb. Dəyən itki hər il 100 milyardlarla ABŞ dolları ilə hesablanır”.
Onun sözlərinə görə, FAO qlobal təşkilat olaraq iqlim məsələləri ilə bağlı platforma rolunu oynayır və COP prosesində fəal iştirak edir. Azərbaycanın ev sahibliyi etdiyi COP29 zamanı Harmoniya təşəbbüsü irəli sürülüb və bu təşəbbüs istiqamətində işlər davam etdirilir.
“Kənd təsərrüfatı və ərzaq təhlükəsizliyi ilə bağlı konkret layihələr də həyata keçiririk. Azərbaycanla bağlı bir məqamı qeyd etmək istəyirəm. Çox yaxşı haldır ki, Milli Adaptasiya Planı (NAP) qəbul olunub. Biz həmin sənədin yenilənməsi istiqamətində Yaşıl İqlim Fondunun vəsaitlərindən istifadə etməklə layihə icra edə bilərik. Təbii ki, hökumət qurumları tərəfindən maraq göstərilərsə, biz həmin istiqamətdə işləri görməyə hazırıq”, - deyə Bariz Mehdiyev bildirib.
O, çıxışının sonunda gənclərə müraciət edərək deyib: "Ərzaq təhlükəsizliyinin digər təhlükəsizlik sahələri qədər vacib olduğuna inanıram. Mövcud problemlər fonunda da bunu görürük. Bəzi münaqişələrin kənd təsərrüfatına təsiri, istehsal vasitələrinin idxalındakı problemlər, qiymət artımı göstərir ki, ərzaq təhlükəsizliyi məsələsi daima hər bir ölkə üçün prioritet olacaq. Sizin kimi gənclər gələcəkdə bu istiqamətdə aparıcı rol oynayacaqlar”.
Bölmənin digər xəbərləri
