“FAYNƏNŞL TAYMS”: RUSİYA-ALMANİYA MÜQAVİLƏSİ ABŞ-IN XOŞUNA GƏLMİR
ABŞ dövlət katibinin Qafqaz və Cənubi Avropa işləri üzrə müavini Mətyu Brayzə “Faynənşl Tayms Döyçland” qəzetinə müsahibəsində vurğulamışdır ki, Baltik dənizinin dibi ilə qaz kəməri çəkilməsi haqqında 5 milyard dollarlıq müqavilə Avropanın Rusiya qazından asılılığını gücləndirəcəkdir.
Qəzet yazır ki, hazırda Rusiya ilə ABŞ arasında münasibətlər “soyuq müharibə”nin başa çatdığı vaxtdan bəri ən soyuq nöqtədədir. Buna səbəb həm də Birləşmiş Ştatların keçmiş sovet respublikaları Gürcüstan və Ukraynada “rəngli inqilablar” deyilən inqilabları dəstəkləməsidir. Vaşinqtonu narahat edən odur ki, Almaniya kansleri Angela Markel sələfi Gerhard Şröderin hakimiyyətdə olduğu dövrlə müqayisədə Almaniya hökumətini Moskvadan uzaqlaşdırmaq barədə öz niyyətini yerinə yetirmir.
Brayzə müsahibəsində Rusiyaya xəbərdarlıq etmişdir ki, Ukraynaya və ya Gürcüstana qaz verilməsini yenidən kəsmək olmaz. Keçən il qışda qaz kəmərində şübhəli partlayışlardan sonra Gürcüstan iki həftə ərzində qazzsız qalmışdı.
Brayzə Avropa İttifaqının bəzi nümayəndələrinin söylədikləri fikrə tərəfdar olduğunu da açıqlamışdır. Onlar bildirmişlər ki, Baltik qaz kəməri Moskva ilə danışıqlarda Avropanın həmrəyliyini sarsıdır, xüsusən də ona görə ki, bu boru xətti Polşadan yan keçir. Almaniya siyasətçiləri isə bəyan edirlər ki, əksinə, qaz kəməri enerji təhlükəsizliyinin səviyyəsini yüksəldir, çünki onun çəkilməsi sayəsində təchizat marşrutlarının sayı artır.
Brayzənin sözlərinə görə, Rusiyadan çox böyük asılılığa düşməmək üçün Avropa Xəzər regionunun ölkələri ilə, xüsusən, Azərbaycanla daha çox işləməlidir. Onun səsləndirdiyi Amerika proqnozlarına görə, Rusiya on il ərzində Avropa bazarında öz payını indiki 25 faizdən 33 faizədək artıracaqdır. Brayzə vurğulamışdır ki, Azərbaycan Rusiyadan göndərilən qazın həcminin dörddəbiri qədər “mavi yanacaq” ixrac edə bilər.
Bölmənin digər xəbərləri
