Fərhad Hacıyev: “Mentor keysi”nin məqsədi iştirakçıların baxışlarını bir araya gətirməkdir
Bakı, 19 iyul, AZƏRTAC
Bu gün “Yüksəliş” müsabiqəsinin final mərhələsində 130 iştirakçı mübarizə aparır. Müsabiqəyə 17 mindən çox müraciət daxil olub. Onlardan 326 nəfəri yarımfinal mərhələsinə yüksəlib, 130 nəfər isə finala vəsiqə qazanıb. Ənənəvi olaraq final mərhələsində “Mentor keysi”nə xüsusi önəm veririk. Burada ölkəmizin gələcəyi, inkişaf istiqamətləri və Azərbaycanın perspektivləri ilə bağlı iştirakçıların baxışları dinlənilir.
AZƏRTAC xəbər verir ki, bunu “Yüksəliş” müsabiqəsinin işçi qrupunun rəhbəri Fərhad Hacıyev final mərhələsində çıxışı zamanı deyib.
İşçi qrupunun rəhbəri bildirib ki, altıncı “Yüksəliş” müsabiqəsi Azərbaycan Respublikasının Prezidenti İlham Əliyevin müvafiq Sərəncamına əsasən keçirilir.
F.Hacıyev vurğulayıb ki, builki “Mentor keysi”nin əsas məqsədi Azərbaycanın gələcək inkişaf ssenariləri ətrafında müzakirələrin aparılmasıdır.
“Azərbaycanın gələcəkdə təhsil, turizm, nəqliyyat, kənd təsərrüfatı, innovasiya, mədəniyyət və idman sahələrində beynəlxalq mərkəzə çevrilməsi ilə bağlı müxtəlif yanaşmalar müzakirə olunur. Məqsədimiz iştirakçıların dəyərli fikirlərini bir araya gətirmək və onları daha geniş auditoriyaya çatdırmaqdır. Mentorlarımıza da xüsusi təşəkkürümü bildirirəm. Onlar bu gün yeni nəsil idarəçilərlə öz təcrübələrini və baxışlarını bölüşəcəklər”, - deyə işçi qrupunun rəhbəri əlavə edib.
Bölmənin digər xəbərləri
