FİLİP MORRİS” GƏNCLƏR ARASINDA SİQARET ƏLEYHİNƏ TƏBLİĞATI DAVAM ETDİRİR
Mart-aprel aylarında “Filip Morris” şirkətinin Azərbaycan nümayəndəliyi uşaqlar və 18 yaşınadək yeniyetmələr arasında siqaret əleyhinə təbliğat proqramını həyata keçirəcəkdir. Bununla əlaqədar martın 14-də mətbuat konfransında jurnalistlərə bildirildi ki, “Tütün və tütün məmulatları haqqında” Qanun 2002-ci ilin yanvarından qüvvəyə minmişdir və buna görə də indiki kampaniya 1998-ci ildə başlanmış eyni proqramın davamıdır. Xatırladaq ki, 1998-ci ildə bu kampaniya Bakı Şəhər İcra Hakimiyyəti ilə birgə keçirilmiş, 1999-cu ildə “Siqaret çəkməli? Yox, buna vaxt yoxdur!” devizi ilə açıq havada tədbirlər təşkil olunmuş, 2000-ci ildə isə dörd telekanal ilə xüsusi videolentlər nümayiş etdirilmişdir. Ötən illərdəki kimi, bu il də təhsil, gənclər, idman və turizm, səhiyyə nazirlikləri, “Kainat” gənclər mərkəzi, Bakı Bələdiyyə İdarəsi bu kampaniyaya kömək göstərirlər.
Kampaniya Bakı, Sumqayıt, Gəncə və Lənkəran şəhərlərində keçiriləcəkdir. Tütün məmulatının üç min pərakəndə və topdan satış məntəqəsinə 10 min xəbərdaredici etiket, 5 min poster, 6 min məlumat bukleti, habelə “Tütün və tütün məmulatları haqqında” Qanundan çıxarışlar göndəriləcəkdir.
Bölmənin digər xəbərləri
