Finlandiyalıların bir çoxu erkən pensiyaya çıxmaq arzusundadır
Stokholm, 16 oktyabr, Nərgiz Cəfərli, AZƏRTAC
OP maliyyə qrupu tərəfindən aparılan sorğuya əsasən, finlandiyalıların 48 faizi tez pensiyaya çıxmaq istəyir.
AZƏRTAC xəbər verir ki, əsas səbəb işdən başqa hər hansı bir məşğuliyyətlərə vaxt ayırmaq istəyidir.
Erkən pensiyaya çıxmaq istəyi xüsusilə 35-49 yaşlı insanlar arasında güclüdür. Gənclər də bunu arzulayır. 26-34 yaşlı hər beş nəfərdən biri 50 yaşından əvvəl pensiyaya çıxmaq istəyir. Bu, Finlandiya Pensiya Mərkəzinin müəyyən etdiyi pensiya yaşı hədəfindən xeyli fərqlənir: 1995-ci ildə minimum pensiya yaşı 68-dir.
“OP Life Assurance” şirkətinin direktoru Kristiina Mihelsson nəticələri həyəcanverici adlandıraraq, onların fərdi istəklərlə ictimai ehtiyaclar arasında ziddiyyəti əks etdirdiyini qeyd edib. O, əmək ömrünün uzadılmasının pensiya sisteminin davamlılığı üçün vacib olduğunu vurğulayıb.
Respondentlərin demək olar ki, yarısı ideal pensiya yaşının 60-69, üçdə biri isə hətta 60-dan daha erkən olduğunu hesab edir. Finlandiya Pensiya Mərkəzinin məlumatına görə, keçən il gözlənilən orta pensiya yaşı 63,1 olub.
Mihelssonun fikrincə, erkən pensiyanın reallığa çevrilməsi üçün uzunmüddətli qənaət və investisiyalar, eləcə də həyatın bütün mərhələlərində işçilərə daha çox dəstək lazımdır.
Bölmənin digər xəbərləri
