Fövqəladə Hallar Nazirliyi Milli Qurtuluş Gününə həsr olunmuş tədbir keçirib
Bakı, 13 iyun, AZƏRTAC
Fövqəladə Hallar Nazirliyində 15 İyun – Milli Qurtuluş Günü münasibətilə tədbir keçirilib.
Nazirliyin İctimaiyyətlə əlaqə idarəsindən AZƏRTAC-a verilən məlumata görə, əvvəlcə Ulu Öndər Heydər Əliyevin abidəsi önünə gül dəstələri qoyulub, Ümummilli Liderin əziz xatirəsi dərin ehtiramla yad edilib.
Tədbir Azərbaycan Respublikasının Dövlət Himninin səsləndirilməsi ilə başlayıb.
Çıxış edənlər Milli Qurtuluş Gününün tarixi əhəmiyyətindən, Ümummilli Lider Heydər Əliyevin misilsiz xilaskarlıq missiyasından bəhs ediblər. Bildirilib ki, müstəqilliyimizin ilk illərində dövlət idarəetməsindəki səriştəsizlik nəticəsində ölkədə hökm sürən xaos və dərin böhran nəticəsində gənc respublikamız məhv olmaq təhlükəsi ilə üz-üzə qalmışdı. Belə bir ağır şəraitdə xalqın təkidli çağırışlarına cavab olaraq Ulu Öndər Heydər Əliyevin 1993-cü ilin iyununda Naxçıvandan Bakıya qayıtması Azərbaycan tarixinin həlledici dönüş nöqtəsi oldu. Ölkəmizi parçalanmaqdan, vətəndaş qarşıdurmasından, anarxiyadan xilas edən Ümummilli Liderin çoxşaxəli fəaliyyəti nəticəsində Azərbaycan dinamik inkişaf edən, beynəlxalq miqyasda nüfuzu gündən-günə artan bir dövlətə çevrildi.
Tədbirdə qeyd edilib ki, Ulu Öndərin uğurlu siyasi kursu Prezident, Müzəffər Ali Baş Komandanı İlham Əliyev tərəfindən uğurla davam etdirilir. Məhz bunun nəticəsidir ki, Ermənistanın 30 ilə yaxın müddətdə işğal altında saxladığı əzəli torpaqlarımız Müzəffər Ali Baş Komandanın müdrik rəhbərliyi ilə şanlı Ordumuz tərəfindən 44 gün ərzində azad edildi, eyni zamanda, həyata keçirilmiş lokal antiterror tədbirləri nəticəsində suverenliyimiz tam bərpa olundu. Beləliklə, Ulu Öndərin ən ümdə vəsiyyəti şərəflə yerinə yetirildi, xalqımız öz dədə-baba yurdlarına qovuşdu, Xocalı və digər faciələrimizin günahkarları öz layiqli cəzalarını aldı.
Tədbirin yekununda “Nərimanfilm” kinostudiyasının ərsəyə gətirdiyi “Doğma torpaq” filmi nümayiş olunub.
Bölmənin digər xəbərləri
