Fransa beynəlxalq hüquqa hörmətsizlik edərək atdığı addımlarla özünü gülünc vəziyyətə salır
Bakı, 19 noyabr, AZƏRTAC
Azərbaycan Silahlı Qüvvələrinin erməni təcavüzkarlarına vurduğu ağır zərbələr və torpaqlarımızın işğaldan azad olunması uğrunda aparılan haqlı mübarizədən zəfərlə çıxması işğalçı ölkənin havadarlarının ciddi narahatlığına səbəb olub. Belə narahatlardan biri də ATƏT-in Minsk qrupunun həmsədrlərindən biri, özünü “demokratiyanın carçısı” kimi tanıdan Fransadır. Ermənistan rəsmən təslim olan gündən Fransanın prezidenti Emmanuel Makronun yuxusu sanki ərşə çəkilib. O, saxta faktların yer aldığı bəyanatlar verməklə işğalçını dəstəkləyir, dövlət başçısına yaraşmayan hərəkətlərə yol verməklə nəinki özünə, hətta beynəlxalq hüquq normalarına da hörmətsizlik edir.
Bu fikirləri AZƏRTAC-a Azərbaycan Azad Respublikaçılar Partiyasının sədri, siyasi elmlər üzrə fəlsəfə doktoru, Kamil Seyidov deyib.
K.Seyidov bildirib ki, Makron Azərbaycanın ərazi bütövlüyünün bərpası üçün başladığı Vətən savaşının dayandırılmasını təkid edirdi. Halbuki bütün dünyaya bəlli idi ki, müharibəni ilk başlayan Ermənistan olub. Təcavüzkarın yanında olduğunu açıq şəkildə bəyan edən Makron, əslində, Fransanı ATƏT-in həmsədrliyindən kənarda qoyur, daha doğrusu, təcrid edirdi. O, Fransanın Ermənistanın, erməni xalqının yanında olacağını gizlətmədi. Bununla da cəbhədəki gərginliyin eskalasiyasını ermənilərin ziyanına daha da gərginləşdirdi. Minsk qrupunun həmsədri olan bir ölkənin liderinin belə bir bəyanat verməsi həm Fransanı, həm də onun başçısını gülünc vəziyyətə saldı. Bu, dünyanın tanınmış ictimai-siyasi xadimlərini də şok vəziyyətinə saldı. Əvvəla, ona görə ki, bunu deyən Minsk qrupunun həmsədri olan ölkələrdən birinin lideri idi. O, əsl reallığı, döyüşlərin Azərbaycan ərazisində getdiyini unutmamalı idi. İkincisi, Makron canişin kimi, imperiya dərəbəyi kimi danışırdı. Əslində, Makron işğalçının yanında olduğunu açıq şəkildə təsdiqlədi.
Prezident, Müzəffər Ali Baş Komandan İlham Əliyevin “Bir də 30 il gözləyə bilmərik!” ifadəsi xalqın iradəsinin tərkib hissəsi kimi səsləndi. Xalqın iradəsi isə yüksək hüquqi qüvvəyə malik bir konstitusion gücə malikdir. Bu güc özünü 44 gün ərzində göstərdi və Ermənistan ordusu rəsmən təslim oldu. Noyabrın 10-da Azərbaycan və Rusiya prezidentləri və Ermənistanın baş nazirinin imzaladıqları birgə Bəyanat Qələbəmizi rəsmən təsdiqlədi.
Bu günlərdə Fransadan daha bir rüsvayçı məlumat yayılıb. Bildirilir ki, Paris meriyası qondarma “Dağlıq Qarabağ respublikası”nı tanımağa hazırlaşır. Bu da ATƏT-in Minsk qrupunun həmsədr dövlətindən beynəlxalq hüquq normalarına növbəti hörmətsizlik. Dünyanın heç bir ölkəsi, hətta işğalçı Ermənistan tərəfindən tanınmayan qondarma “Dağlıq Qarabağ respublikası” Fransa meriyası tərəfindən hansı əsaslarla tanına bilər? Axı, bu bölgədə indiyədək keçirilmiş saxta seçkilərin nəticələri də heç bir ölkə və ya beynəlxalq təşkilat tərəfindən tanınmayıb.
Fransa merinin qatı ermənipərəst olduğu və müavininin, həmçinin digər işçilərinin erməni əsilli olması bəllidir. O da bəllidir ki, Fransa meriyası erməni lobbisinin əlində oyuncaqdır. Çünki indiki mer Ann İdalqonun bu vəzifəyə seçilməsində erməni lobbisinin böyük rolu olub. İndi bunun əvəzində Fransa meriyası da beynəlxalq hüquq normalarına açıq şəkildə hörmətsizlik edir. Bu işdə Fransa prezidentinin rolunun olması danılmazdır. Çünki Paris Şurasının əksər üzvləri prezident Emmanuel Makronun yaratdığı və rəhbərlik etdiyi “İrəli Fransa” partiyasının üzvləridir.
Artıq Fransa prezidentinin, ümumilikdə hökumətin reytinqinin sürətlə aşağı düşdüyü aydın şəkildə özünü büruzə verir. Ötən bir ay ərzində Makronu dəstəkləyənlərin sayı 7 faiz aşağı düşüb. Makrona etibarın itməsinin əsas səbəbi isə əhalinin problemləri ilə, o cümlədən 2 ilə yaxın müddətdə Fransada davam edən sarı jiletlilərin sosial-iqtisadi məsələlərlə bağlı irəli sürdükləri haqlı tələblərin yerinə yetirilməməsi, onlara qarşı güc tətbiq edilməsi ilə insan haqlarının pozulmasına şərait yaradılması və digər problemlərin həllində lazımsız sərt mövqe tutmasıdır. Öz ölkəsinin problemləri ilə məşğul olmaq əvəzinə, “zavallı ermənilərin” qayğısına qalan Makron bu yolla növbəti seçkilərdə erməni seçicilərə “xilas yolu” kimi baxır. Fransa prezidentinin ermənipərəst mövqe ortaya qoymasının əsas səbəblərindən biri budur. Onun vasitəçilik missiyasının tam ziddinə olan “Hamımız birlikdə müqavimət göstərəcəyik. Əmin olun” sözləri ilə Ermənistana verdiyi vəd, əslində, Fransadakı erməni seçicilərə verilən vəd idi. Ancaq dövlət başçımızın polad iradəsi, rəşadətli ordumuzun düşmən üzərindəki tarixi qələbəsi həm Ermənistanın, həm də onun havadarlarının bütün ümidlərini alt-üst etdi.
Artıq Dağlıq Qarabağda hər hansı bir statusdan söhbət gedə bilməz. İşğal altında olan ərazilərimizdə Azərbaycan bayrağı dalğalanır. Bundan sonra ATƏT-in Minsk qrupunun və Fransa kimi ikili oyun oynayan vasitəçilərin köməyinə ehtiyac yoxdur. 44 günlük müharibədən sonra Azərbaycan Ordusunun şanlı Qələbəsi də təsdiqlədi ki, başda Prezident, Müzəffər Ali Baş Komandan İlham Əliyev olmaqla, Azərbaycan öz problemlərini öz gücü ilə həll etməyə qadirdir.
Bölmənin digər xəbərləri
