Fransa müdafiə sənayesini gücləndirmək üçün 15 milyard avro kredit alacaq
Paris, 11 aprel, AZƏRTAC
Avropa İttifaqının (Aİ) Şurası Fransaya SAFE (Avropada Təhlükəsizlik Fəaliyyəti) maliyyə alətindən istifadə hüququ verən qərarı təsdiqləyib.
AZƏRTAC xəbər verir ki, bu qərar çərçivəsində Fransa təxminən 15,09 milyard avro məbləğində kredit əldə edə biləcək və bu vəsait ölkənin müdafiə sənayesinin gücləndirilməsinə yönəldiləcək.
Gələcək həftələrdə təxminən 2,26 milyard avro ilkin maliyyə vəsaitinin ayrılması gözlənilir. Bu vəsait Avropa Komissiyası ilə Paris arasında kredit sazişinin bağlanmasından sonra təqdim olunacaq.
SAFE çərçivəsində vəsait əldə etmək üçün ən azı iki üzv dövlətin birgə satınalma proseduruna qoşulması tələb olunur. Lakin müvəqqəti istisna ilə satınalmada bir dövlət də iştirak edə bilər. Həmçinin, Ukrayna, Avropa İqtisadi Bölgəsi (EEE) və Avropa Azad Ticarət Assosiasiyası (AELE) ölkələri və Kanada SAFE-nin 17-ci maddəsi çərçivəsində xüsusi razılaşma əsasında bu birgə satınalmalara qoşula bilərlər.
Fransa və Çexiyanın SAFE mexanizminə qoşulması ilə artıq 18 üzv dövlət bu maliyyələşmədən istifadə hüququna malik olub.
Bölmənin digər xəbərləri
