FRANSA SENATININ SƏDRİ KRİSTİAN PONSÖLENİN NİTQİ
-Cənab Azərbaycan Respublikasının Prezidenti!Çox hörmətli xanım Əliyeva!
Cənab nazirlər!
Cənab senatorlar və əziz həmkarlar!
Cənab səfirlər!
Zati-aliləri, xanımlar və cənablar, artıq gördüyünüz kimi, bu axşam buraya müxtəlif sahələrdən olan, lakin bir-biri ilə sıx dostluq əlaqələri qurmuş məsuliyyətli şəxslər toplaşmışdır. Mən buraya toplaşan böyük fransız-Azərbaycan ailəsini görməkdən olduqca məmnunam. Sizləri görməkdən və Sizə əziz dostlar kimi müraciət etməkdən çox şadam.
Cənab Prezident,
Hörmətli xanım Əliyeva,
İlk öncə, cənab Prezident, icazə verin, son illər ərzində, xüsusən də 2004-cü ilin yanvar ayında xaricə, Fransaya ilk səfəriniz çərçivəsində Sizinlə görüşdüyümüz tarixi salonda Sizi yenidən qəbul etməkdən məmnun olduğumu bildirim. Bu, ölkə başçısı kimi Sizin ilk rəsmi səfəriniz oldu və biz bunu olduqca yüksək qiymətləndirdik. Mən Azərbaycan dövləti başçısının Fransaya ilk dövlət səfəri çərçivəsində xanımınızın müşayiəti ilə burada Senat sədrinin salonunda keçirilən yeni görüşü əlaqələrimizin möhkəmləndirilməsinə sadiqliyinizin rəmzi və dostluq əlaməti kimi dəyərləndirirəm.
Cənab Prezident, ölkələrimiz arasında mövcud olan münasibətlər gözəldir. Apardığımız siyasi dialoq zəngin və genişdir. Bu iş məni çox sevindirir, çünki əminliyin bəzən tərəddüdlə əvəz olunduğu bir vaxtda dünyada sabitliyi, tarazlığı və təhlükəsizliyi arzulayan ölkələr arasında əməkdaşlığın aparılması böyük əhəmiyyət daşıyır.
Parlamentlərarası əməkdaşlığımız fəaldır, qarşılıqlı səfərlər dövri xarakter daşıyır. Onun dinamik inkişafı, əsasən, Fransa-Qafqaz parlamentlərarası qrupunun sədri, burada əyləşən həmkarımız və dostumuz Ambruaz Düponun fəaliyyəti ilə bağlıdır. Mədəni əlaqələrimiz inkişaf edir və Senat hazırkı mədəni mübadilələrimizin tanınmış qüvvəsi olan Bakıda Fransa Mədəniyyət Mərkəzinin yaradılması layihəsini dəstəkləməyindən qürur hissi duyur. Bildiyiniz kimi, həmin Mərkəz Senatın təşəbbüsü ilə təsis edilmişdir və mən çox şadam ki, onun fəaliyyəti uğurludur və o, münasibətlərimizin inkişafına xidmət edir.
Aydındır ki, iqtisadi əlaqələrimiz siyasi münasibətlərimiz səviyyəsində deyil, lakin bu qeyri-tarazlığın aradan qaldırılması üçün hər iki tərəfdən böyük səylərin göstərildiyini bilirəm. Bu baxımdan, cənab Prezident, icazə verin, Sizin həmçinin bu məqsədə nə qədər yüksək dərəcədə nail olmağa çalışdığınızı vurğulayım. Ötən ilin dekabr ayında fransız sahibkarlarından ibarət nümayəndə heyətini şəxsən qəbul etdiniz və hazırkı səfəriniz çərçivəsində artıq bir neçə müqavilə imzalanmışdır. İqtisadiyyatının şaxələndirilməsi yolunda böyük səylər göstərən və 2005-ci ildə 26 faiz iqtisadi artım göstəricisi ilə seçilən Azərbaycana fransız müəssisələrinin artan marağını müşahidə etməkdən şadam.
Cənab Prezident, əziz dostum!
Azərbaycan elə burada qəbul etmək şərəfinə nail olduğum rəhmətlik atanızın rəhbərliyi altında, indi isə, Sizin rəhbərliyinizlə çox dəyişikliklərdən keçmişdir. Lakin özünün ənənəvi dəyərlərini, dini dözümlülüyünü və nəhayət, hələ 1918-ci ildə qadınlara seçki hüququ verərək, onların mövqeyini möhkəmləndirmək əzmini qoruyub saxlaya bilmişdir. Təbii ki, biz bunu etiraf etməliyik ki, Siz qadın ilə kişi arasındakı bərabərliyi bizdən öncə tanımısınız.
İrəliyə doğru atılmış bu cür gözəl addımla yanaşı, təhdidlər hələ də qalmaqdadır. Söhbət sülhdən gedir. Bildiyiniz kimi, Fransa Senatı, - icazə verin, mən bunu bir daha xatırladım, - Cənubi Qafqazda münaqişələrin aradan qaldırılmasına öz fəal töhfəsini verir. Fransa Senatının sədri olduğum vaxtdan etibarən mən Cənubi Qafqazın üç parlamenti arasında əməkdaşlıq və müzakirələrin aparılması məqsədi ilə şəxsən çalışmışam. 1999-cu ilin dekabr ayında Versalda təşkil etdiyim ilk görüşdən sonra bir çox bu cür toplantılar keçirilmişdir. Göstərilmiş səylər turizm və mədəni irsin qorunması sahələrində regional əməkdaşlığı inkişaf etdirmək qərarı ilə nəticələndi. Bu məqsədlə hesabatlar hazırlanmış və hər bir tərəfə göndərilmişdir. Biz Senatda ümid edirik ki, onlar gələn aylar ərzində hamı tərəfindən müzakirə olunacaqdır. Bilirəm ki, sülhün bərqərar olunmasına sadiqliyi ilə tanınan ölkənizin dəstəyinə arxalana bilərəm. Münaqişələrin ədavət və güc hesabına həllinin mümkünsüzlüyünü anlamaq nəinki vətəndaşların, o cümlədən siyasətçilərin ən böyük məsuliyyətidir. Sülh gələcəkdir. Biz onu bir çox zamanlar faydasız olan, əsrlər boyu aparılmış müharibələr və münaqişələrdən sonra Avropada hiss etmişik.
Xüsusən Minsk qrupu daxilində çalışan və daimi sadiqliyinə bələd olduğunuz Fransa və Avropa İttifaqının qonşuluq siyasəti çərçivəsində ölkənizlə tədbirlər planı imzalamış bütün Avropa hələ də həll olunmamış Dağlıq Qarabağ münaqişəsinin qəti və razılaşdırılmış formada nizamlanmasında Sizin tərəfinizdə olacaqdır. Mən belə ümidlərə əlavə əsasları görürəm.
Yekun olaraq, icazə verin, bu badəni xalqlarımız arasındakı dostluğun şərəfinə, Sizin və xanım Əliyevanın şərəfinə qaldırım.
Yaşasın Azərbaycan!
Yaşasın Fransa!
Yaşasın Fransa-Azərbaycan dostluğu!
Bölmənin digər xəbərləri
