Fransada anbarlarda qaz ehtiyatlarının həcmi 25 faizdən aşağı düşüb
Bakı, 19 fevral, AZƏRTAC
Saxlama həcminə görə Avropanın ilk beş ölkəsi arasında yer alan Fransada yeraltı anbarlardakı qaz ehtiyatları 25 faizdən aşağı düşüb.
AZƏRTAC xəbər verir ki, “Gas Infrastructure Europe” assosiasiyasının məlumatına görə, fevralın 17-də Fransa anbarlarında təxminən 3,2 milyard kubmetr qaz olub, bu da ümumi tutumun 24,87 faizinə bərabərdir.
Qaz saxlama həcminə görə digər aparıcı ölkələr də yanacaq ehtiyatından aktiv şəkildə istifadə edirlər. Hazırda Almaniyada anbarların 40,65 faizi, Avstriyada 54,27 faizi, İtaliyada 55,03 faizi, Niderlandda isə 29,79 faizi doludur.
Avropada bu sahədə ən yüksək göstərici Portuqaliyada müşahidə olunur – 100 faizə yaxın. Həmçinin ehtiyatlara görə lider ölkələr arasında İsveçdə 88,05 faiz, İspaniyada 66,87 faiz, Polşada isə 55,99 faiz qaz yığılıb.
Hazırda Avropadakı anbarlarda qaz ehtiyatlarında təxminən 43 faizlik azalma var. Fevral ayında anbarlardan götürülən qazın həcmi son dörd il ərzində bu ay üçün rekord göstəricidir. Buna baxmayaraq, ayın əvvəlində yeraltı anbarlarda mavi yanacağın həcmi tarixdə altıncı ən yüksək səviyyədədir.
Avropa İttifaqı isitmə mövsümü başlayandan bəri yeraltı anbarlardan təxminən 61 milyard kubmetr qaz çıxarıb ki, bu da payız-qış mövsümündə oraya doldurulan yanacağın həcmini xeyli üstələyir.
Bölmənin digər xəbərləri
