FRANSADA SONUNCU DAŞ KÖMÜR MƏDƏNİ DƏ BAĞLANDI

27.04.2004 [13:44]
Çap et
A⁺ A^-

AZƏRTAC-ın xüsusi müxbiri Parisdən xəbər verir ki, vaxtilə Fransa sənayesinin mühüm bir sahəsi olmuş daş kömür istehsalına son qoyuldu. Mozuldəki sonuncu La Uv kömür şaxtası bağlandı. Beləliklə, 3 əsrə yaxın yaşı olan bu sənaye sahəsi Fransada artıq tarixə çevrilmişdir. Fransada ilk dəfə daş kömür istehsalına 1720-ci ildə Fresne - sür -Esko adlı mədəndən başlanmışdır. XIX əsrdə sənayenin inkişafı, buxar maşınının icad edilməsi kömürə olan tələbatı artırmışdır. Ölkənin daş kömürlə zəngin Şimal və Şərq bölgələrində rekord miqdarda kömür istehsal olunmuşdur. XX əsrin əvvəllərində şaxtalarda 200.000 fəhlə çalışmış və ildə 41 milyon ton kömür çıxarılmışdır.

XX əsrin 50-ci illərində isə ölkədə kömürə tələbat daha da artmışdır. Həmin illərdə 300.000 şaxtaçı ildə 71 milyon ton kömür istehsal etmişdir.

Son illərdə yeni enerji mənbələrindən istifadə, bir tonu 160 avroya başa gələn fransız kömürü ilə müqayisədə bir tonu 25-20 dollar olan Amerika kömürünün dünya bazarındakı qiyməti ölkənin daş kömür istehsalına güclü təsir etmişdir.

Fransadakı şaxtalar artıq kömür sənayesinin tarixindən bəhs edən müzeylərə çevrilmişdir.

Ölkədəki sonuncu daş kömür şaxtasının bağlanması ilə əlaqədar aprelin 25-dən başlayaraq üçgünlük bayram keçirilir.