Gənc liderlər BMT-də Dağlıq Qarabağ münaqişəsini müzakirə etmişlər
Bakı, 3 iyul (AZƏRTAC). Amerika Birləşmiş Ştatlarının Filadelfiya şəhərində yerləşən “Chesnut Hill” Kollecində iyunun 22-də başlayan “Gənc liderlərin dünyanın qlobal problemlərinin həllində rolu” adlı beynəlxalq layihə başa çatmışdır. İyulun 1-də bununla bağlı Nyu-Yorkda, BMT-nin mənzil-qərargahında tədbir keçirilmişdir.
Litva Azərbaycanlı Gənclər Təşkilatından AZƏRTAC-a bildirmişlər ki, tədbirdə Avropanın 28 ölkəsindən, həmçinin Azərbaycandan və Gürcüstandan gənclər iştirak etmişlər. Onlar dünyanın qlobal problemləri ilə bağlı statistik və dəqiq faktlara əsaslanan geniş təqdimatlar hazırlamışlar.
Tədbirdə qlobal problemlərdən biri kimi “məcburi köçkünlər” mövzusu Azərbaycan təmsilçisi tərəfindən irəli sürümüş və bununla bağlı yaradılan qrupda Almaniya, Azərbaycan, Gürcüstan və Polşa nümayəndələri bir araya gəlmişlər. Onlar 8 gün müddətində hazırladıqları təqdimatlarla BMT-nin müxtəlif qurumlarından olan rəsmilər qarşısında çıxış etmişlər.
Litva Azərbaycanlı Gənclər Təşkilatının sədri Samir Musayev mövzunun aktuallığını qeyd etmiş, özünün də Qarabağda doğulmasına baxmayaraq, həmin torpaqlara gedə bilmədiyini söyləmişdir. O, Ermənistanın BMT Təhlükəsizlik Şurası tərəfindən Dağlıq Qarabağ münaqişəsi ilə bağlı qəbul edilmiş 4 qətnaməni hələ də yerinə yetirmədiyini, bir milyondan çox qaçqın və məcburi köçkünün 20 ildən artıqdır ki, öz doğma yurdlarına qayıda bilmədiklərini diqqətə çatdırmışdır.
Toplanan materiallar əsasında cari ilin sentyabr ayında kitab nəşr ediləcəkdir.
Azərbaycan nümayəndələrinin Nyu-Yorka səfəri Gənclər və İdman Nazirliyinin dəstəyi ilə həyata keçirilmişdir.
Bölmənin digər xəbərləri
