GƏNCLƏR ARASINDA TƏCRÜBƏ VƏ İNFORMASİYA MÜBADİLƏSİNİN APARILMASI ZƏRURİDİR
Həmin gün gənclər və idman naziri Azad Rəhimov təhsil, gənclərlə iş, idman, neft, coğrafiya, dilçilik və ekologiya sahələrində Səudiyyə Ərəbistanında fəaliyyət göstərən gənclərlə görüşmüşdür. Nazir iki ölkə arasında gənclər və idman sahələrindəki səmərəli əməkdaşlığın mövcudluğundan, əldə edilən uğurlardan söz açmış və demişdir ki, dövlətimizin başçısı, Milli Olimpiya Komitəsinin prezidenti İlham Əliyevin gənclərə və idmana göstərdiyi diqqət və qayğısı nəticəsində hazırda ölkənin qanunverici və idarəetmə orqanlarında əsasən gənclər çalışır. O, idmançıların mötəbər yarışlarda yüksək nailiyyətlər qazanmaları barədə qonaqlara məlumat vermiş, Azərbaycan əhalisinin 65 faizinin gənclər təşkil etdiyini diqqətə çatdırmış, Azərbaycan və Səudiyyə Ərəbistanının gəncləri arasında təcrübə və informasiya mübadiləsinin aparılmasının zəruriliyini bildirmişdir. Məlumat verilmişdir ki, ərəbistanlı gənclər sentyabrın 17-dək davam edəcək səfər çərçivəsində Sabirabadda məskunlaşmış məcburi köçkünlərin yaşayış şəraiti, regionlarda gənclərin fəaliyyəti ilə tanış olacaq, Bakı, Şamaxı, Gəncə, Şəki, Qəbələ və Qobustandakı tarixi mədəniyyət abidələrinə, muzeylərə səyahət edəcək, ölkəmizin mənzərəli guşələrinə baş çəkəcəklər.
Nümayəndə heyətinin rəhbəri Əbdüləziz əl Dəxil ölkəmizə ilk dəfə gəlişindən çox məmnun olduğunu vurğulamış və onlara göstərilən yüksək qonaqpərvərliyə görə Prezident İlham Əliyevə və digər şəxslərə minnətdarlığını bildirmişdir. Görüşdə Səudiyyə Ərəbistanı Krallığının ölkəmizdəki səfiri Əli Həsən Əhməd Cəffər də iştirak etmişdir.
Səfərin ilk günü qonaqlar Milli Olimpiya Komitəsi, Bakı Olimpiya İdman Kompleksi, Tofiq Bəhramov adına Respublika stadionu və İçərişəhər tarixi memarlıq qoruğu ilə tanış olmuşlar.
Bölmənin digər xəbərləri
