Hörmətli görüş iştirakçıları!

Ölkəmizin idman həyatına böyük sevinc bəxş edən XXVIII Yay Olimpiya Oyunları artıq tarixə çevrilmişdir. Bu Olimpiya Oyunları ölkəmizin idman ictimaiyyətinin yaddaşına həmişəlik həkk olunacaq mühüm idman hadisəsidir. Çünki 202 ölkənin qatıldığı bu mötəbər yarışda idman tariximizdə ilk dəfə olaraq, Azərbaycan idmançıları 5 medal - 1 qızıl, 4 bürünc medal əldə etmişlər.

Sözsüz ki, biz bu gün fikirləşmədən, ürəkdən gələn böyük fərəh hissi ilə deyə bilərik ki, qazanılmış bu müvəffəqiyyətin əsası Azərbaycan idmanının ən böyük dayağı, himayədarı olan ümummilli liderimiz Heydər Əliyevin ölkəyə rəhbərliyi dövründə qoyulmuşdur. Ölkəmizin idmansevərləri bu dahi rəhbərin respublika idmanının tərəqqisinə, xüsusilə də Olimpiya Oyunlarına, idmançılarımızın bu yarışlara hazırlığına və iştirakına nə qədər böyük diqqət və qayğı ilə yanaşdığını daim xatırlayırlar.

Afina Olimpiya Oyunlarına hazırlıq proqramı da bu qırılmaz zəncirin bir həlqəsi olmuşdur. Oyunlara hazırlıq ümummilli liderimiz Heydər Əliyevin 2003-cü il iyulun 5-də verdiyi “XXVIII Yay Olimpiya Oyunlarına hazırlıq haqqında” Sərəncamına əsasən, mütəşəkkil və səmərəli şəkildə həyata keçirilmişdir.

Möhtərəm Prezident!

Milli Olimpiya Komitəsi ilə Gənclər, İdman və Turizm Nazirliyinin birgə tərtib etdikləri hazırlıq konsepsiyası Azərbaycan idmançılarının Afina Olimpiadasına hazırlığının əsas sənədi olmuşdur. Konsepsiyanın tələb etdiyi istiqamətdə aparılan hazırlıq prosesi uğurla başa çatdırılmışdır. Hazırlıq dövrü ərzində idmançıların sosial-məişət problemlərinin həlli ilə bərabər, vəsiqə əldə edən hər bir idmançının və onun şəxsi məşqçisinin təqaüdlərlə təmin edilməsi onları daha da ruhlandırmışdır.

İdmançılarımız çox çətin mübarizədən keçərək, xüsusilə ötən Olimpiada ilə müqayisədə xeyli çətinləşdirilmiş şərtləri dəf edib, XXVIII Yay Olimpiya Oyunlarında iştirak hüququ verən 36 lisenziya qazanmışdır. 2 vəsiqə isə idmançılarımıza Beynəlxalq Üzgüçülük Federasiyası tərəfindən təqdim olunmuşdur.

Milli Olimpiya Komitəsi və Nazirlik bu ilin may ayında milli olimpiya komandamızın heyətini təsdiq etmişdir.

İdman nümayəndə heyətinin təşkilati məsələləri və texniki təminatı da yüksək səviyyədə həll olunmuşdur. Nümayəndə heyəti idman və parad geyimləri, eləcə də idman geyimlərinin xüsusiyyətlərinə uyğun olaraq, müasir avadanlıq və ləvazimatla təmin edilmişdir.

Cənab Prezident!

Avqustun 4-də, artıq Olimpiya oyunlarına idmançıların yola salınması məkanına çevrilmiş və xatirələrlə dolu olan Zuğulbadakı “Gənclik” beynəlxalq turizm mərkəzində Afina Olimpiadasının iştirakçıları ilə görüşünüz, əminəm ki, hər bir idmançının xatirəsində hələ uzun zaman yaşayacaqdır. Orada Sizin söylədiyiniz dərin məzmunlu nitqiniz, verdiyiniz tapşırıq və tövsiyələriniz nəinki idmançılarımızı, hər bir məşqçini, mütəxəssisi məsuliyyətli olmağa sövq etmişdir.

Avqustun 10-da milli olimpiya komandamızın böyük bir hissəsi onları yola salanların xeyir-duaları ilə Olimpiadaya yola düşmüşlər. Qeyd edim ki, həmin günə kimi artıq bizim missiyamız Afinada bu yönümdə fəaliyyət göstərirdi. Komandamızın missiyası Afinada olduğu müddətdə tələb olunan şəraitin yaradılmasını təmin etmişdir.

Afinada təyyarədən düşən idmançılar rəsmi qeydiyyat prosesini keçdikdən sonra Olimpiya kəndinə gəlmişlər.

Həmin gün saat 7-də Olimpiya kəndinin bayraqlar xiyabanında ölkəmizin dövlət bayrağı qaldırılmış, nümayəndə heyətimizin hər bir üzvü isə bu tədbirdə yüksək məsuliyyət hissi ilə iştirak etmişdir.

Yarışların başlanmasına qalan vaxtdan səmərəli istifadə edən idmançılar onlar üçün əvvəlcədən müəyyənləşdirilmiş idman qurğularında məşqlərini davam etdirmişlər. İlk gündən başlayaraq, Olimpiya Oyunlarının sonuna kimi nümayəndə heyətinin həkim üzvləri idmançılara fərdi qaydada tələb olunan tibbi xidməti və nəzarəti normal qaydada təmin etmişlər. İstirahət vaxtlarında həm idmançılar, həm də heyətimizin digər üzvləri qədim idman şəhəri kimi tanınan Afina ilə yaxından tanış olmuş və burada keçirilən tədbirlərdə fəal iştirak etmişlər.

Möhtərəm Prezident!

Sizin avqustun 12-də Afinaya gəlişiniz milli komandamızda böyük canlanma yaratmışdır.

Olimpiadanın təntənəli açılış mərasimi dünya idmançılarının böyük idman bayramına çevrilmişdi. Ölkəmizin komandası stadiona 6-cı dövlət olaraq çıxmış və açılışda iştirak edən dünya dövlətlərinin nümayəndələri və yüz minlərlə tamaşaçılar tərəfindən alqışlanmışlar.

Möhtərəm Prezident!

XXI əsrin ilk Olimpiadasına sahiblik edən Afinada Mədəni Olimpiya Komitəsi tərəfindən təşkil edilmiş və Sizin təşəbbüsünüzlə şəhərin ən gözəl otellərindən sayılan “Divani Karavel”də keçirilmiş “Azərbaycan günü” unudulmaz və bənzərsiz tədbir olmuşdur. Bu tədbirdə Sizin nitqiniz ölkəmizdə idmanın inkişafı, olimpiya hərəkatının tərəqqisi, idmana münasibət haqqında qonaqlarda dolğun fikrin formalaşmasında müstəsna rol oynamışdır. Sözsüz ki, salonda quraşdırılmış böyük ölçülü ekranlarda müstəqil Azərbaycan dövlətinin iqtisadi və sosial sahələrinin dirçəlməsində misilsiz xidmət göstərmiş ümummilli liderimiz Heydər Əliyevin fəaliyyətini əks etdirən fraqmentlər, ölkəmizin mədəniyyətinin, incəsənətinin, o cümlədən rəssamlıq və xalçaçılıq sənətinin nümayişi, göstərilən qısametrajlı filmlər xarici ölkələrin nümayəndələrini Azərbaycanla tanış etmiş, adət-ənənələrimiz barədə müsbət fikir yaratmışdır.

İnanıram ki, mərasimdə iştirak edən Beynəlxalq Olimpiya Komitəsinin sabiq prezidenti Xuan Antonio Samaranç, Beynəlxalq Olimpiya Komitəsinin prezidenti Jak Roqq və digər rəsmi nümayəndələr, milli olimpiya komitələrinin rəhbərləri həmin günü xoş təəssüratlarla yad edəcəklər.

Məhz bu baxımdan Olimpiya Oyunları lazımi təbliğat üçün geniş auditoriyadır, xalq diplomatiyasının aparıcı xətlərindən biridir.

Cənab Prezident!

Yarışlar avqust ayının 14-də start götürmüşdür. İdmançılarımızdan yunan-Roma güləşçisi Fərid Mansurov bütün rəqiblərinə inamla qalib gələrək, fəxri kürsünün ən yüksək pilləsinə qalxmış və bu idman növü üzrə ölkəmizə ilk olimpiya qızılını bəxş etmişdir. Fəridin bu böyük qələbəsi XXVIII Yay Olimpiya Oyunlarında Azərbaycan idmançılarının əldə etdiyi ən yüksək nailiyyəti oldu.

XXVIII Yay Olimpiya Oyunlarında 25 avqust günü idman tariximizə qızıl hərflərlə həkk olundu. Güləş sarayında olan azərbaycanlıların, Azərbaycandan gəlmiş idman azərkeşlərinin sevincinin həddi-hüdudu yox idi. Doğma Azərbaycanımızın bayrağının dövlət himnimizin sədaları altında Olimpiya Oyunlarında hamıdan yüksəyə qaldırılmasının canlı şahidi olmaq hər bir azərbaycanlı üçün həyatda ən böyük fəxr, qürur və xöşbəxtlikdir.

Güllə atıcımız İradə Aşumova və stend atıcılığı üzrə Sidney Yay Olimpiya Oyunlarının qalibi Zemfira Meftahətdinova uğurla çıxış edərək, bürünc medalı qazanmışlar. Həm İradənin, həm də Zemfiranın son illərdə beynəlxalq yarışlarda əldə etdikləri nəticələr onların Afinada da yüksək nailiyyət qazanacaqlarından xəbər verirdi. Bu, belə də oldu.

Yarışlarda ölkəmizi daha çox sayda təmsil edən Azərbaycan boks məktəbinin yetirmələri bir daha böyük ustalıq və məharət nümayiş etdirərək, daha iki bürünc medalın Olimpiya salnaməmizə yazılmasına nail oldular. Ağası Məmmədov və Fuad Aslanov öz vəzifələrinin öhdəsindən bacarıqla gəldilər.

Ölkəmizi təmsil edən cüdoçular, taekvondoçular və eləcə də qılıncoynadan Yelena Jemayeva bu Olimpiya Oyunlarında səylə mübarizəyə qatılsalar da, medallardan kənarda qaldılar.

Bunda bəzən hakimlərin qeyri-obyektiv mövqeyi rol oynasa da, istisna etməməliyik ki, idmançılarımızın yarışlara psixoloji cəhətdən kifayət qədər hazır olmamaları, eləcə də bir sıra digər amillər də öz təsirini göstərmişdir.

Bu mötəbər dünya idman oyununda sərbəst güləşçilərimizin yüksək nəticələr göstərəcəyinə ümid bəsləyirdik. Çünki güləşçilərimiz beynəlxalq miqyasda öz sözünü demiş pəhləvanlardır. Onların öz imkanlarından aşağı səviyyədə çıxışları bizi kədərləndirsə də, əldə etdiyimiz 5-ci yer gələcək yarışların nailiyyətlərinə təkan verməlidir. Turan Mirzəyev və Alan Naniyev 4-cü və 7-ci yerləri tutmalarına baxmayaraq, ağır atletlərimiz daha yaxşı çıxış etməyə şanslı idilər. Müəyyən istisna olmaqla, ağır atletlərimizin çıxışlarını qeyri-qənaətbəxş hesab edirəm. Əlbəttə, bu amil məşqçiləri dərindən düşündürməli, vəziyyətin aradan qaldırılması üçün konkret tədbirlərin görülməsini sürətləndirməlidir.

Möhtərəm Prezident!

Məlum olduğu kimi, bədii gimnastika üzrə Olimpiadada respublikamızın idman şərəfini Dinarə Gimatova qorumalı idi. Onun təlim-məşq toplanışları zamanı zədələnməsi nəticəsində mütəxəssislərin rəyinə görə, Anna Qurbanova yarışlarda iştirak etmiş və o, çox gənc idmançı olmasına baxmayaraq, inamla yarışmışdır. Bu isə Anna Qurbanovanın gələcək perspektivini açıqlayır.

Üzgüçülərimizin və yüngül atletlərimizin göstərdikləri nəticələr onların respublika yarışlarında əldə etdikləri nəticələrdən belə yuxarı olmamışdır. Gələcəkdə onların öz üzərlərində daha əzmlə işləyəcəklərinə, idman ustalıqlarını artıracaqlarına ümid edirik.

Bir sıra idmançılarımız bu yarışlarda medal qazana bilməsələr də, böyük şücaət və qəhrəmanlıq nümayiş etdirdilər. Belə ki, uzun illərdən sonra rinqə qayıdan boksçumuz Rövşən Hüseynov ciddi zədə almasına baxmayaraq, mübarizəni əzmlə davam etdirmişdir. Taekvondoçumuz Rəşad Əhmədov isə ilk döyüşdən sonra barmağının sınmasına və bu vəziyyətdə döyüşməyin nə qədər çətin olmasına baxmayaraq, növbəti döyüşlərini də mübariz ruhda keçirmişdir.

Bütövlükdə ölkəmizin Afina Olimpiadasında 5 medal (1 qızıl, 4 bürünc) qazanması, 16 idmançımızın ilk onluğa düşməsi onların uğurlu çıxışlarının əyani göstəricisidir.