GƏNCLƏR ÖLKƏMİZDƏ APARILAN QURUCULUQ İŞLƏRİNDƏ FƏAL İŞTİRAK ETMƏLİDİRLƏR
AZƏRTAC xəbər verir ki, Gənclər Mərkəzi İctimai Birliyi (GMİB) Gənclər üçün Təhsil Mərkəzi ilə birgə ümummilli liderimiz Heydər Əliyevin anadan olmasının 84-cü ildönümü və cari ilin Gənclər ili elan edilməsi münasibətilə “Gənclər Prezident İlham Əliyevin uğurlu iqtisadi siyasətini dəstəkləyir” devizi altında həyata keçirilməsi planlaşdırılan aksiya ilə bağlı mayın 16-da Beynəlxalq Mətbuat Mərkəzində mətbuat konfransı keçirmişlər.
GMİB-nin sədri Babək Mehdiyev bildirmişdir ki, qurum tərəfindən bir müddət öncə “Regionların sosial-iqtisadi inkişafı Dövlət Proqramı”nın həyata keçirilməsində gənclərin iştirakı” mövzusunda konfrans keçirilmişdir. Həmin konfransda mövzunun aktuallığını qeyd edən natiqlər, regionların sosial-iqtisadi inkişafının məhz sabahımıza, gəncliyimizə yönəldiyini söyləmişlər. Gənclərimiz də ölkəmizdə gedən inkişafla bağlı proseslərdən kənarda qalmamalı, bu işlərdə fəal iştirak etməlidirlər.
Natiq diqqətə çatdırmışdır ki, rəhbərlik etdiyi qurum regionlarda yaşayıb fəaliyyət döstərən gəncləri ölkəmizdə həyata keçirilən iqtisadi inkişaf proseslərinə daha fəal cəlb etmək məqsədi ilə bölgələrə səfərə çıxmaq qərarına gəlmişdir.
Mayın 17-də ilk səfərin Füzuli rayonunun Horadiz qəsəbəsinə təşkil ediləcəyini bildirən B.Mehdiyev, növbəti görüşün Qəbələ rayonunda keçiriləcəyini söyləmişdir.
Hər bir bölgədə həyata keçiriləcək aksiyalarda 10-dan çox incəsənət ustasının iştirak etməsi də nəzərdə tutulmuşdur.
Tədbirdə çıxış edən sənətçilər aksiyanın həyata keçirilməsinin mühüm əhəmiyyət daşıdığını diqqətə çatdırmış və bu işdə fəal iştirak edəcəklərini vurğulamışlar.
Bölmənin digər xəbərləri
