“Gənclər üçün akademik Əli Quliyev mükafatı” müsabiqəsinə sənəd qəbul olunur
Bakı, 19 may, AZƏRTAC
AMEA akademik Əli Quliyev adına Aşqarlar Kimyası İnstitutunda gənc alim və mütəxəssislər arasında institutun yaranmasının 55 illiyinə həsr olunan “Gənclər üçün akademik Əli Quliyev mükafatı” müsabiqəsi keçiriləcək.
İnstitutdan AZƏRTAC-a bildirib ki, müsabiqədə bu müəssisədə çalışan və yüksək elmi nəticə göstərən gənc alimlər iştirak edə bilər. Namizədlərin seçimi bir neçə meyar əsasında aparılacaq. Meyarlara namizədlərin əldə etdiyi nəticələrin elmi və praktik əhəmiyyəti, nüfuzlu xarici (impakt faktoru yüksək olan) jurnalda dərc olunan məqalələri, xarici ölkələrdə beynəlxalq konfranslarda məruzə etməsi, patent alması, elmi əsərlərinə olan istinadlar daxildir.
Koronavirus pandemiyası ilə əlaqədar Azərbaycanda ölkə səviyyəsində karantin rejimi tətbiq olunduğu üçün müsabiqəyə sənədlər mayın 31-dək onlayn rejimdə qəbul edilir.
Müsabiqədə Ekspert Komissiyasının yekun rəyi əsasında I, II və III yerlər üzrə qaliblər seçiləcək, onlara diplom və pul mükafatları təqdim olunacaq. Karantin rejimi uzadılarsa, qaliblərin təqdimatı “Zoom” platforması üzərindən onlayn rejimdə keçiriləcək.
Bölmənin digər xəbərləri
