Genetik Ehtiyatlar İnstitutunda magistr hazırlığı distant formada davam etdirilir
Bakı, 3 aprel, AZƏRTAC
AMEA-nın prezidenti, akademik Ramiz Mehdiyevin “AMEA-nın magistrantları üçün distant (məsafədən) tədrisin təşkil edilməsi haqqında” Sərəncamına əsasən, Genetik Ehtiyatlar İnstitutunda təhsil alan magistrantlar üçün dərslər distant formada tədris olunur.
İnstitutdan AZƏRTAC-a bildirilib ki, elmi müəssisədə dünyanın tanınmış universitetlərinin tədris proqramlarına uyğun formalaşdırılmış xüsusi proqramlarla 4 ixtisas - genetika, insan genetikası, bitkilərin seleksiyası, bitkilərin mühafizəsi üzrə magistr hazırlığı aparılır. Tədris prosesi seçilmiş professor-müəllim heyəti tərəfindən müasir avadanlıq və cihazlarla təmin olunmuş laboratoriyalarda eksperimental və nəzəri olaraq həyata keçirilir. Hazırda institutun I kurs magistraturasında 5, II kursda isə 4 nəfər təhsilini davam etdirir. Martın 29-dan başlayaraq dərs cədvəlləri əsasında və elektrоn vasitələrdən istifadə olunmaqla həftənin I, III və V günləri onlayn dərslər təşkil edilib, II, IV günlər isə magistrların seminar dərslərinə hazırlaşmaları üçün nəzərdə tutulub.
Genetika və insan genetikası ixtisaslarında müxtəlif qruplar üzrə bəzi dərslər (populyasiya genetikası, biotexnologiya və gen mühəndisliyi) birləşdirilərək biologiya elmləri doktoru Aybəniz Əliyeva və biologiya üzrə fəlsəfə doktoru Sevda Babayeva tərəfindən keçirilir. Digər fənlər isə biologiya üzrə fəlsəfə doktoru Elçin Hacıyev, elmi işçilər Bayram Bayramov və Babək Şahmurad tərəfindən tədris olunmaqdadır.
Bitkilərin seleksiyası və bitkilərin mühafizəsi ixtisaslarında müvafiq dərslərin AMEA-nın müxbir üzvü İlham Şahmuradov, biologiya elmləri doktoru, professor Ramiz Əliyev, biologiya elmləri doktoru Aybəniz Əliyeva, biologiya üzrə fəlsəfə doktoru, dosent Xanbala Rüstəmov, biologiya üzrə fəlsəfə doktorları Nailə Məmmədova və Eldar Mustafayev tərəfindən distant tədrisi həyata keçirilir. Magistrantlara e-mail vasitəsilə mühazirə mətnləri göndərilir və elektron (“Zoom”, “Skype” və sair) vasitələrdən istifadə edilərək dərslərin izahı verilir. İkinci kursda təhsillərini davam etdirən magistrlar isə pedoqoji təcrübənin keçirilməsi tələblərinə uyğun distant şəkildə I kurs magistrantların dərslərinə qoşulurlar. Pedoqoji təcrübənin rəhbəri Gülarə Hüseynzadə tərəfindən gələcək həftələrdə magistrların bəzi onlayn dərsləri aparılması da planlaşdırılır. İkinci kurs magistrantlar təcrübi işlərini yekunlaşdırıb və hazırda nəticələrin analizi üzrə fəaliyyətlərini davam etdirirlər. Magistrların elmi rəhbərləri dissertasiya işlərinin vaxtında yazılıb yekunlaşdırılması üçün distant olaraq öz tövsiyələrini verirlər. Həmçinin institutun təhsil şöbəsinin müdiri, biologiya üzrə fəlsəfə doktoru Vüsalə İzzətullayeva tərəfindən professor-müəllim heyətinə və magistrantlara texniki məsələlərdə köməklik göstərilir, ümumi prosesə nəzarət edilir.
Bölmənin digər xəbərləri
