GÖYÇAYDA SOYUDUCU ANBAR KOMPLEKSİNİN İNŞASINA BAŞLANILMIŞDIR
Göyçay, 17 yanvar (AZƏRTAC). Göyçay rayonunda meyvə-tərəvəz məhsullarının saxlanılması üçün ilk soyuducu anbar kompleksinin tikintisinə başlanılmışdır.
Rayon icra hakimiyyətindən bildirmişlər ki, Şamaxı-Yevlax avtomobil yolunun kənarında, Göyçayın Ərəbcəbirli kəndi ərazisində tikilən 2 min tonluq soyuducu anbar kompleksinin inşasına 3,5 milyon manat vəsait xərclənəcəkdir.
Layihənin icrası üçün İqtisadi İnkişaf Nazirliyinin Sahibkarlığa Kömək Milli Fondu tərəfindən 2 milyon manat, yəni kompleksin ümumi dəyərinin 70 faizi həcmində kredit ayrılmışdır.
Artıq binanın təməli qoyulmuş və hörgü işlərinə başlanılmışdır. Hazırda tikintidə “NJT-2000” MMC-nin 20 nəfər işçisi və 10-a yaxın texnikası fəaliyyət göstərir.
“Paralel” MMC-nin sifarişi ilə inşa edilən anbarda 10 ədəd soyuducu kamera quraşdırılacaqdır. Kameralarda temperatura, rütubətə və atmosfer təzyiqinə mərkəzləşdirilmiş kompyuter sistemi ilə nəzarət ediləcəkdir.
Almaniya və Türkiyə istehsalı olan avadanlıqla təchiz ediləcək soyuducu anbar kompleksinin cari ilin sonunadək istifadəyə verilməsi nəzərdə tutulur.
Bölmənin digər xəbərləri
