Göygöl rayonunda soyqırımı qurbanlarının xatirəsi anılıb
Bakı, 31 mart, AZƏRTAC
Ombudsmanın Gəncə Regional Mərkəzinin təşəbbüsü ilə Göygöl rayonundakı İbrahim Hüseynov adına orta məktəbdə 31 mart - Azərbaycanlıların Soyqırımı Gününə həsr edilmiş tədbir keçirilib, faciə qurbanlarının xatirəsi anılıb
Bu barədə AZƏRTAC-a Ombudsman Aparatından məlumat verilib.
Tədbirdə çıxış edən Gəncə Regional Mərkəzinin rəhbəri Səbuhi Abbasov ermənilərin 1918-ci il martın 31-də xalqımıza qarşı törətdiyi dəhşətli soyqırımı barədə danışıb. Bildirib ki, bu hadisələr tariximizin ən faciəli səhifələrindən biridir. Həmin gün erməni-bolşevik birləşmələri, silahlı daşnaklar dinc azərbaycanlılara qarşı amansız vəhşiliklər törədib, kütləvi qətllər həyata keçiriblər. Son vaxtlar Qubada aşkarlanmış soyqırımı məzarlığı erməni vəhşiliyini təsdiqləyən daha bir əyani sübutdur.
Azərbaycan Respublikasının insan hüquqları üzrə müvəkkili Elmira Süleymanovanın 31 mart - Azərbaycanlıların Soyqırımı Günü ilə əlaqədar dünya ictimaiyyətinə, o cümlədən BMT-nin baş katibinə, qurumun Təhlükəsizlik Şurasına, İnsan Hüquqları üzrə Ali Komissarına, Avropa Komissiyasına, Avropa Şurasına, ATƏT-ə, Beynəlxalq və Avropa Ombudsmanlar institutlarına və digər təşkilatlara ünvanlanmış bəyanatı tədbir iştirakçılarının diqqətinə çatdırılıb.
Sonra mövzu ətrafında çıxışlar olub.
Bölmənin digər xəbərləri
