GUÖAM ÖLKƏLƏRİ SƏFİRLƏRİNİN GÖRÜŞÜ
Daşkənddə “GUÖAM ölkələri səfirləri klubu”nun növbəti görüşü keçirilmişdir. Görüşdə Azərbaycan, Gürcüstan, Ukrayna və Moldovanın Özbəkistandakı səfirləri, Özbəkistan baş nazirinin müavini Rüstəm Yunusov, müşahidəçi kimi Bolqarıstan, Rumıniya və Latviya, qonaq kimi Türkiyə, Qazaxıstan, Türkmənistan, Qırğızıstan və Tacikistan səfirliyinin nümayəndələri iştirak etmişlər.
Baş nazirin müavini Rüstəm Yunusov öz çıxışında qeyd etmişdir ki, TRASEKA proqramı həyata keçiriləndən bəri 46 layihədən istifadə edilmişdir. Bu layihələrin 33-ü texniki, 13-ü isə investisiya layihələridir.
R.Yunusov daha sonra demişdir: Bu ayın sonunda Daşkənddə TRASEKA Hökumətlərarası Komissiyasının növbəti iclası keçiriləcək və bu toplantıda bir sıra vacib məsələlərin həlli nəzərdə tutulur.
Azərbaycanın Özbəkistandakı səfiri Aydın Əzimbəyov ölkəmizin bu sahədə öz üzərinə götürdüyü öhdəliklərə əməl etdiyini qeyd etmiş, görülən işləri yada salmışdır. Səfir qurumun indiki fəaliyyəti, onun qarşısında duran problemlərdən də danışmışdır.
Sonra Gürcüstanın Özbəkistandakı səfiri Givi Abduşelişvili, Ukraynanın səfiri Anatoli Kasyanenko və başqaları öz çıxışlarında Avropa-Qafqaz-Asiya nəqliyyat dəhlizinin inkişafı və nəticədə Qərb və Şərqin daha sıx inteqrasiyasından danışmış, Daşkənddəki GUÖAM ölkələri səfirlərinin görüşünü ildə bir dəfə deyil, hər ay keçirilməsi zəruriliyini qeyd etmişlər.
Qulu Kəngərli
AZƏRTAC-ın xüsusi müxbiri
DAŞKƏND
Bölmənin digər xəbərləri
