DÜNYA
GÜRCÜSTAN MİLLİ TƏHLÜKƏSİZLİK ŞURASININ KATİBİ İNTİHAR ETMİŞDİR
Gürcüstan Milli Təhlükəsizlik Şurasının katibi Nuqzar Sacaya intihar etmişdir. İlkin məlumatlara görə, o, Gürcüstan Dövlət Dəftərxanasındakı kabinetində özünü xidməti tapançası ilə öldürmüşdür.
Nuqzar Sacaya yaralı halda Tbilisidəki respublika xəstəxanasına çatdırılmış, lakin cərrahiyyə əməliyyatı zamanı keçinmişdir.
Nuqzar Sacaya Gürcüstan Prezidentinin ən çox etibar etdiyi şəxslərdən biri hesab olunurdu. Sacaya 1995-ci ildən Gürcüstan Milli Təhlükəsizlik Şurası yarandığı vaxtdan onun katibi vəzifəsində işləyirdi.
Gürcüstan parlamenti sədrinin müavini Vaxtanq Rçeulişvili Milli Təhlükəsizlik Şurasının katibi Nuqzar Sacayanın intihar etməsi ilə bağlı bəzi məlumatlar vermişdir. O demişdir ki, fevralın 25-də səhər Sacaya öz kabinetində müşavirə keçirmişdir. “Sonra o, özü barəsində məqalələr dərc olunmuş qəzetləri oxumuşdur. Daha sonra isə öz kabinetində divanın üstündə özünü güllə ilə vurmuşdur”.
İlkin məlumatlara görə, intiharın səbəblərindən biri Sacaya barəsində irəli sürülmüş belə bir ittiham olmuşdur ki, guya o, kəşfiyyat departamentinin rəhbəri ilə birlikdə Gürcüstanın sabiq prezidenti Qamsaxurdiyanın, Milli Demokratik Partiyanın lideri Çanturiyanın və polis generalı Quluanın qətlini planlaşdırmışdır.
İTAR-TASS-ın yaydığı məlumata görə, Milli Təhlükəsizlik Şurasının katibi özü barəsində deyilənləri “böhtan və mənəvi terror” adlandırmış və ölkənin Baş prokuroruna müraciət etmişdi.