Gürcüstan parlamentinin sədri Milli Məclisdə olmuşdur
Bakı, 7 iyul (AZƏRTAC, Əsəd Məmmədov). Gürcüstan parlamentinin sədri David Usupaşvilinin başçılıq etdiyi nümayəndə heyəti iyulun 7-də Azərbaycan Respublikasının Milli Məclisində olmuşdur.
AZƏRTAC xəbər verir ki, Gürcüstan parlamentinin sədri Milli Məclisin inzibati binası, iclas zalı və Heydər Əliyev xatirə zalı ilə tanış olmuşdur. Xatirə zalında ulu öndər Heydər Əliyevin zəngin həyat yolunu, siyasi və dövlətçilik fəaliyyətini əks etdirən çoxsaylı fotoşəkillər, eksponatlar David Usupaşvilidə dərin təəssürat yaratmışdır. Qonaq xatirə kitabına ürək sözlərini yazmışdır.
Sonra Milli Məclisin sədri Oqtay Əsədov və Gürcüstan parlamentinin sədri David Usupaşvili arasında təkbətək görüş keçirilmişdir.
Daha sonra görüş nümayəndə heyətlərinin iştirakı ilə geniş tərkibdə davam etmişdir.
Oqtay Əsədov bildirmişdir ki, bu cür səfərlər ölkələrimiz, eləcə də parlamentlərimiz arasındakı əlaqələrin inkişafına öz töhfəsini verir.
Azərbaycan-Gürcüstan əlaqələrinin qədim tarixi köklərə malik olduğunu xatırladan Milli Məclisin sədri qeyd etmişdir ki, hər iki ölkənin xalqları arasında da dostluq və qardaşlıq münasibətləri vardır. Ölkələrimiz müstəqilliklərini bərpa etdikdən sonra əlaqələr yeni müstəviyə qalxmışdır. Sevindirici haldır ki, bu münasibətlər artıq strateji tərəfdaşlıq səviyyəsinə yüksəlmişdir.
Azərbaycan və Gürcüstan arasındakı münasibətlərin möhkəm hüquqi bazaya malik olduğunu deyən Oqtay Əsədov vurğulamışdır ki, bu günə qədər iki ölkə arasında 100-dən artıq ikitərəfli sənəd imzalanmışdır. Ötən il ölkələrimiz arasındakı ticarət dövriyyəsi 660 milyon dollardan yuxarı olmuşdur.
Azərbaycanın və Gürcüstanın iştirakı ilə regionda reallaşdırılan irimiqyaslı layihələrə toxunan Oqtay Əsədov Bakı-Tbilisi-Qars dəmir yolu xəttinin ilin sonuna qədər yekunlaşacağını qeyd etmişdir.
Milli Məclisin sədri hər iki ölkənin parlamentləri arasında da yüksək səviyyəli münasibətlərin olduğunu bildirmiş, əlaqələrin gələcəkdə daha da dərinləşdirilməsinin önəmini qeyd etmişdir. O.Əsədov hər iki ölkənin parlament nümayəndələrinin beynəlxalq təşkilatlarda eyni mövqedən çıxış etmələrinin əhəmiyyətli olduğunu vurğulamışdır.
Oqtay Əsədov Azərbaycan, Türkiyə və Gürcüstanın iştirakı ilə üçtərəfli formatda keçirilən görüşlərin önəmli olduğunu bildirmiş, bu cür görüşlərin parlamentlərin komitələri arasında da keçirilməsini yüksək qiymətləndirmişdir.
Azərbaycanda səfərdə olmasından məmnunluğunu bildirən Gürcüstan parlamentinin sədri David Usupaşvili bu görüşün iki ölkə arasındakı münasibətlərin müzakirəsi baxımından önəm kəsb etdiyini bildirmişdir. D.Usupaşvili demişdir: “Azərbaycan-Gürcüstan əlaqələri yüksək səviyyədədir. Biz bu əlaqələrin gələcəkdə daha da inkişaf etdirilməsini istəyirik. Bütün əsas məsələlərdə hər iki ölkənin maraqları üst-üstə düşür”.
D.Usupaşvili iki ölkə arasında münasibətlərin inkişafında parlamentlərarası əlaqələrin mühüm rol oynadığını bildirmişdir.
Gürcüstan parlamentinin sədri, həmçinin ölkələrimizin birgə həyata keçirdikləri layihələrin əhəmiyyətini vurğulamışdır.
Bölmənin digər xəbərləri
