GÜRCÜSTANDA 21 GÖMRÜK-BURAXILIŞ MƏNTƏQƏSİNDƏN 5-İ İXTİSAR EDİLƏCƏKDİR
AZƏRTAC-ın müxbiri xəbər verir ki, Gürcüstanda hazırda 21 gömrük-buraxılış məntəqəsi fəaliyyət göstərir. Gömrük Departamentinə bu yaxınlarda sədr təyin olunmuş Glorgi Qodabrelidze bildirmişdir ki, gələcəkdə həmin məntəqələrin sayı 16-ya endiriləcəkdir. Sədrin sözlərinə görə, Azərbaycan Respublikası ilə sərhəddə üç gömrük-buraxılış məntəqəsi – Vaşlovani, Udabno və Sadaxlo ləğv ediləcəkdir. Bu barədə artıq azərbaycanlı həmkarlarla razılığa gəlinmişdir. Həmçinin “Mamisonis” məntəqəsinin bağlanması ilə əlaqədar Rusiya Federasiyasının gömrük xidməti ilə danışıqlar aparılır. Bu məntəqədən nəinki yük daşınmır, heç piyadalar da keçmirlər. Ona görə də həmin məntəqəni saxlamaq faydasızdır. Kutaisi hava limanındakı buraxılış məntəqəsi də yaxın günlərdə öz fəaliyyətini dayandıracaqdır.
Bölmənin digər xəbərləri
