Gürcüstanda yaşayan azərbaycanlı müəllim: Heydər Əliyev bizim üçün birlik, tərəqqi və ilham mənbəyidir
Tbilisi, 12 dekabr, AZƏRTAC
“Mən Gürcüstanda yaşayan azərbaycanlı gənc olaraq, böyük qürur hissi ilə qeyd etmək istəyirəm ki, Heydər Əliyev təkcə Azərbaycan xalqı üçün deyil, bütün dünyada öz müdrik siyasəti və liderliyi ilə tanınan bir şəxsiyyətdir. Onun irsi bu gün də milyonlarla azərbaycanlının ürəyində yaşayır və gələcək nəsillər üçün əsl örnəkdir”.
Bu sözləri AZƏRTAC-a müsahibəsində Bakıda ali təhsil almış, hazırda Tbilisidə ingilis dili müəllimi işləyən gənc soydaşımız Arzu Əliyeva deyib.
O deyir ki, Heydər Əliyev hər bir azərbaycanlı üçün milli qürur və birlik rəmzidir. Onun siyasəti yalnız Azərbaycanın inkişafına deyil, həm də bölgədəki xalqlar arasında dostluq və əməkdaşlığın möhkəmlənməsinə xidmət edib. Gürcüstan və Azərbaycan arasındakı strateji tərəfdaşlıq məhz onun uzaqgörən liderliyi nəticəsində qurulub.
“Valideynlərimizdən, yaşlı nəslin nümayəndələrindən eşitmişik ki, Ulu Öndər Heydər Əliyev Gürcüstanda yaşayan azərbaycanlılara xüsusi qayğı göstərirdi. Onun təşəbbüsü nəticəsində buradakı soydaşlarımız təhsil, mədəniyyət və sosial hüquqlar sahəsində əhəmiyyətli dəstək əldə ediblər. Məhz onun siyasəti sayəsində biz milli kimliyimizi qoruyaraq doğma dilimizdə təhsil almaq və mədəniyyətimizi inkişaf etdirmək imkanı qazanmışıq” - deyə, A.Əliyeva vurğulayıb.
O bildirib ki, Ümummilli Liderin ən böyük tarixi nailiyyətlərindən biri Bakı-Tbilisi-Ceyhan neft, Bakı-Tbilisi-Ərzurum qaz kəmərləri, Bakı-Tbilisi-Qars dəmir yolu layihələridir. Bu layihələr təkcə Azərbaycan və Gürcüstan üçün deyil, bütün region, eləcə də Avropa və Asiya üçün mühüm əhəmiyyət kəsb edir. Ulu Öndərin əsasını qoyduğu bu layihələr ölkələrimizin iqtisadi inkişafına və beynəlxalq mövqelərinin möhkəmlənməsinə böyük töhfə verir:
“Biz Gürcüstanda yaşayan azərbaycanlı gənclər olaraq, Heydər Əliyevin irsini böyük hörmətlə qoruyur və onun ideyalarını gələcək nəsillərə çatdırmağa çalışırıq. Onun rəhbərliyinin nəticəsi olan dostluq və əməkdaşlığı daha da möhkəmləndirmək üçün bütün gücümüzlə çalışacağıq. Fenomen şəxsiyyət Heydər Əliyev bizim üçün təkcə bir lider deyil, həm də birlik, tərəqqi və ilham mənbəyidir. Onun irsini qorumaq və gələcək nəsillərə ötürmək bizim əsas vəzifəmizdir”.
AZƏRTAC-ın xüsusi müxbiri
Tbilisi
Bölmənin digər xəbərləri
