GÜRCÜSTANIN BİRİNCİ XANIMI ELMİ-TƏDQİQAT AĞCİYƏR XƏSTƏLİKLƏRİ İNSTİTUTUNDA OLMUŞDUR
AZƏRTAC xəbər verir ki, ölkəmizdə səfərdə olan Gürcüstanın birinci xanımı Sandra Elizabet Rulofs sentyabrın 27-də Elmi-Tədqiqat Ağciyər Xəstəlikləri İnstitutunda olmuşdur.
Qonaq əvvəlcə institutun uşaq şöbəsi ilə tanış oldu. Uşaqlara hədiyyələr təqdim edərək, onlarla səmimi söhbət etdi.
Daha sonra Gürcüstanın birinci xanımı institutun laboratoriyasına baxdı. Məlumat verildi ki, Qafqazda analoqu olmayan bu laboratoriyanın vərəm çöplərinin aşkarlanması baxımından çox böyük əhəmiyyəti vardır. Ən müasir avadanlıqla təchiz olunmuş bu laboratoriyada çalışan həkimlər Almaniya, Latviya və Polşada ixtisasartırma kurslarında iştirak edəcəklər.
Səhiyyə naziri Oqtay Şirəliyev Azərbaycanda vərəmə qarşı çox ciddi profilaktik tədbirlərin aparıldığını bildirərək dedi ki, hazırda respublikada 22 vərəm dispanseri fəaliyyət göstərir. Dispanserlərdə qeydiyyatda olan xəstələr barədə məlumatlar vahid elektron bazada yerləşdiriləcəkdir. Bu sistemə keçməklə, Azərbaycanın hətta ən ucqar dağ kəndlərində də vərəmə yoluxmuş xəstənin müalicəsi barədə məlumat almaq mümkün olacaqdır. Başqa sözlə, məqsəd Azərbaycanın bütün bölgələrində bu xəstəlikdən əziyyət çəkən insanları keyfiyyətli müalicə ilə təmin etməkdir.
Son illər iqtisadi sahədə qazanılmış uğurların ölkədə səhiyyənin inkişafına mühüm təsir göstərdiyini deyən nazir bu sahənin maddi-texniki bazasının gücləndirilməsi üçün dövlət büdcəsindən ayırmaların həcminin xeyli artdığını vurğuladı.
Ətraflı məlumata görə təşəkkür edən xanım Sandra Rulofs Azərbaycanda səhiyyə sisteminin inkişafından məmnunluğunu söylədi.
######
Bölmənin digər xəbərləri
