CƏMİYYƏT
HƏKİMLƏRİMİZİN PEŞƏKARLIĞINA YÜKSƏK QİYMƏT
Azərbaycanın Səudiyyə Ərəbistanındakı səfirliyindən aldığımız məlumata görə, səfir Elman Araslı ilə krallığın səhiyyə naziri doktor Usama bin Əbdülməcid Şubukşinin görüşündə iki ölkə arasında səhiyyə sahəsində əlaqələrin, xüsusilə həkimlərimizin krallıq klinikalarında işə cəlb edilməsində əməkdaşlığın inkişafı barədə fikir mübadiləsi aparılmışdır.
Nazir hazırda ölkənin klinikalarında çalışan azərbaycanlı həkimlərin iş bacarığı və professionallığı barədə özünün və ictimaiyyətin rəylərinin yüksək olduğunu və bu sahədə əməkdaşlığı davam etdirmək niyyətini nəzərə çatdırmışdır. O, Səudiyyədə işləməyə hazırlaşan azərbaycanlı həkimlərin yeni qrupunun ölkəyə gəlişini tezləşdirmək məqsədi ilə müvafiq göstəriş verdiyini bildirmiş və onlar üçün öz yerlərində ingilis dili kurslarının təşkilinin vacib olduğunu qeyd etmişdir.