Həmkəndlilər arasında mübahisə ölümlə nəticələndi
Göyçay, 23 noyabr, AZƏRTAC
Göyçayda həmkəndlilər arasındakı mübahisə ölümlə nəticələnib.
AZƏRTAC-ın bölgə müxbiri xəbər verir ki, hadisə ötən gün axşam saatlarında rayonun Bəydövül kəndində qeydə alınıb. Belə ki, kənd sakini, 1974-cü il təvəllüdlü Mustafayev Qılman Maarif oğlu şəxsi münasibətlər zəminində aralarında baş verən dava zamanı həmkəndlisi, 1983-cü il təvəllüdlü İsmayılov Elvin Mübariz oğlunu bıçaqlayıb. Ürək nahiyəsindən iki bıçaq zərbəsi alan Elvin İsmayılov xəstəxanaya aparılarkən yolda ölüb. Məlumata görə, bir neçə gün əvvəl keçirilən toy mərasimi zamanı onların arasında dava olub və yenidən başlayan mübahisə ölümlə nəticələnib.
Qətli törədən Qılman Mustafayev polis əməkdaşları tərəfindən saxlanılıb. Elvin İsmayılovun cəsədi müayinə üçün Respublika Məhkəmə Tibbi Ekspertiza və Patoloji Anatomiya Birliyinin Göyçay rayon şöbəsinə aparılıb.
Hüquq-mühafizə orqanlarının əməkdaşları hadisə yerinə baxış keçirib. Faktla bağlı Göyçay Rayon Prokurorluğu tərəfindən araşdırma aparılır.
Bölmənin digər xəbərləri
